Виктория МОСКВИНА (снимкыште) Медведево районысо Юбилейный школын 9-ше классыштыже тунемеш. «Виктория» олимпийский резерв спорт школышто тренировкым эрта. Ече дене 10 ий коштеш. Тугеже палыза, спортын ты видше дене Виктория мыняр ияш кылым кучаш тӱҥалын?
Спорт деке ӱдырым ачаже шӱмаҥден. Тудо шкежат тале спортсмен лийын. Тренер С.А.Кугергин дене куд ий тренировкым эртен. Кызыт Сергей Анатольевич – Викториян тренерже.
– Кумшо классыште тунеммем годым Юбилейный посёлкышто эртаралтше ече марафонышто икымше верым налынам. Тиде мыйын икымше сеҥымашем лийын да умбакыже шуаралташ вийым ешарен, – ойла Виктория. – Кужу дистанцийыш каяш утларак йєратем. Шке виемым моштен кучылтам, чытышемат сита.
Йодышемлан вашмутым палышда, очыни? Виктория ече ӱмбаке вич ияшыж годым икымше гана шогалын да кызытат пикшла ончыко чыма. Арняште вич гана тренировкыш коштеш. Сеҥымашыжат уло. Марий Эл Республикын первенствыштыже шке ийготан-влак коклаште кок ий почела икымше верым сеҥен налын. Шукерте огыл Российын первенствышкыже миен. Всероссийский таҥасымаш Сыктывкар олаште эртаралтын.
