10 июльышто Йошкар-Оласе мер-политик рӱдерыште «Мыйын еш архивем» республикысе конкурс иктешлалтын. Тудым Марий Эл Республикысе «Эр вий» йоча да подростко-влакын ушемышт 1994 ий гыч эртара. Кажне гана тӱрлӧ темым авалта. Тений «Добровольчество и благотворительность в истории моей семьи» теме темлалтын. Еш-влак поро пашам шуктымышт нерген палдареныт. «Еш тоштерын ончерже», «Объективыште – порылык» таҥас-влак лийыныт. Пайремыш Йошкар-Ола да республикысе тӱрлӧ район гыч лу еш ушнен. Поян ончерым эскерен, кугешныме кумыл ылыжын. Поро пашам ужын, чонлан ласкан чучын.
Теве Кужэҥер район Токтайбеляк гыч Кирилл Светлаков Юлия Геннадьевна коваж дене пырля еш ончерлан материалым икмыняр ий поген. А поро пашам ышташ коваже уныкажым изинек шӱмаҥден. «Мый пушеҥгым шындем, кайык-влакым пукшем. Арулыкым эскерыме пашаш ушнем. Тений шошым ковам дене опытым ыштенна. Ковышта ден ушмен нӧшмым мландыш урен шытыктаренна да калыклан пуэденна. Шыжым ты нӧшмӧ гыч сай лектыш лиеш манын ӱшанена», – ойла Кирилл.
Йошкар-Ола гыч Жировмыт еш поро паша дене ила, манаш лиеш. Ака-шӱжар Маргарита ден Екатерина волонтёр улыт. Нуно илалше-влаклан, изинек эмганен кушшо йоча-шамычлан полшат. Тӱрлӧ акцийым эртарат. Полыш кидым шуялташ кеч-кунам ямде улыт. «Порылык – чонышто. Поро паша – курымашлык» – конкурсыш ушнышо кажне еш тыгай ой-влак дене ила. Мыланна, жюри еҥ-влаклан, сеҥышым ойыраш куштылго огыл ыле гынат, ойыртемалтше еш-влакым палемденна.
- I вер: Жировмыт еш (Йошкар-Ола).
- II вер: Светлаковмыт еш (Кужэҥер, Токтайбеляк), Кожевников-Обуховмыт еш (Советский).
- III вер: Картузовмыт еш (Волжский, Купсола), Мурашов-Кисилёвмыт еш (Медведево, Мамьярсола).
