5 декабрь – Доброволец-влакын тӱнямбал кечышт.
«Моторлык тӱням утара!» – ойлен кумдан палыме руш серызе Ф.М.Достоевский. Нине шомак-влак тачысе кечыланат келшат. Моторлыкым изи ньога эн ондак суртышто, кудывечыште, пакчаште ужеш. Кушкын шумекыже, шочмо кундемнан сєраллыкше шинчажым куандараш тӱҥалеш. Урем, ял воктенысе пӱя, ер сер-влак, памятник але стеле йырысе кумдык яндар лийышт манын, арулыклан изинек туныктышаш улына. Советский район Кельмаксола школ тиде пашам «Искорка» волонтёр кружок полшымо дене шукта. Тудым биологийым да химийым туныктышто А.Н.Рассолова вуйлата.
– Кружок латкок ий наре пашам ышта. Тышке 6-10-шо класслаште тунемше 20 ӱдыр-рвезе коштеш. Тӱҥ шонымашна девиз семын йоҥга: «Изи паша кугу лектышым пуа». Ме социально-экологический направлений дене пашам ыштена. Волон-тёрын сомылжо гоч шочмо кундемым шымлаш, тӱзаташ, тудын дене кугешнаш таратена, – ойла Алевтина Николаевна.
Йоча-влак туныктышышт дене пырля корем серлаште, йоча модмо верлаште, памятник йыр арулыкым эскерат. «Твори добро», «Чистый берег», «Чистый двор», «Сад памяти», «Синичкин день» да моло акцийлашке ушнат.
– Мемнам шочмо кундемнан ончыкылыкшо тургыжландара. Вершєр яндар лиеш гын, калык таза лиеш. Тугеже ялынат ӱмыржє кужемеш. Йоча-влак, тендамат поро пашам ышташ ӱжына. Ончыкылыклан мутым ме кучена, – ойлат волонтёр-влак.
