Советский район Роҥго школын краеведений тоштержым Н.В.Шабалина вуйлата. Тунемше-влак кажне ийын тӱрлӧ акцийыш, мероприятийыш, шымлыме пашаш, проектыш ушнат. Тений «Школьный музей» российысе конкурсышто, «Без срока давности» российысе конкурсын регионысо йыжыҥыштьыже сеҥышыш лектыныт.
Ик пӧлемыш пурымек, кугезына-влакын илыме жапышке логалмыла чучеш. Тушто шун, кумыж, пу гыч ыштыме арвер-влак аралалтыт. Шондык, тӱрлеман окнашовыч, куымо кӱвар шартыш, шепка да моло ӱзгар эртыше илышыш пӧртылтат.
Нигунам огыт мондалт
2023 ийыште специальный военный операцийыште вуйым пыштыше герой-влаклан залым почыныт. Тидын нерген Наталья Владимировна тыгерак ойла:
– Тыныс илышна верч лӱдде кредалше-шамыч коклаште мемнан школым тунем пытарыше-влакат шке порысыштым шуктат. Геройна-шамычын подвигыштым палышаш да шарнышаш улына. Чаманен каласаш логалеш, снайпер Михаил Михайлович Суворов, гвардий ефрейтор Юрий Геннадьевич Мосунов да эше икмыняр выпускник спецоперацийыште ӱмыр лугыч лийыныт.
Лӱддымылыкым да геройлыкым ончыктымыштлан Патырлык орден дене палемдалтыныт. Нуно нигунам огыт мондалт. Лӱмешышт поро шарнымаш кечым эртарена. Михаилын шочмо кечыжлан теннис турнир лийын. Юрий шахмат, шашке дене модаш йӧратен. Мероприятийым тиде направлений дене кылденна.
Тоштерыште СВО-што ӱмыр лугыч лийше кажне патырын фотожым вераҥдыме да илыш корныжо, наградыже-влак нерген возымо. Залыште эсогыл ВДВ форман манекеным шогалтеныт. Юрий Мосуновын чыла наградыжлан дубликатым ыштыктеныт. Кугу Ачамланде сарым эртыше лӱддымӧ землякна-влакын подвигыштым «Суворовы – фамилия героическая» стендыште ончыктымо.
Туныктышым пагален
Тоштер тӱрлӧ направлений дене паша ышта. Тунемме идалык мучко ятыр материалым чумырат. Ик лукым калык просвещенийын отличникше, педагогике пашан ветеранже, учитель-методист, тиде школышто марий йылме ден литературым ятыр туныктышо Л.П.Петровалан ойыреныт.
Тек тушко тунемше-шамыч ончыкыжымат кумылын коштыт да эртарыме конкурслаште сеҥышыш лектыт.
З.ТИМОФЕЕВА.
И.Речкинын фотожо.
