Пагалыме лудшо-влак, айста таче Башкортостан Республик Мишкан район Кӱрзе кыдалаш школыш унала каена да марий йылмым да литературым туныктышо Т.В.Алаева дене вашлийына. Тудо школышто латкандаш ий пашам ышта.
– Кӱрзе школышто 67 йоча тунемеш. Нунылан латкок туныктышо келге шинчымашым пуа. Ӱдыр-рвезе-влак Кӱрзе, ӱлыл Памаш, Айбылат ялла гыч тунемаш коштыт. Шукынжо марла мутланат. 1-2-шо класслаште вашталтыш шижалташ тӱҥалын, – ойла Татьяна Валентиновна.
Школышто марий йылме ден литературлан кугу тӱткышым ойырат. Урок деч посна тӱрлӧ мероприятий эртаралтеш. Ик эн поян да лектышан – Йылме арня. Ик кечыже марий йылмылан тӱрыснек пӧлеклалтеш.
– Урок модыш семын эртаралтеш. Йоча-шамыч шинчымашыштым викториныште тергат, мастарлыкыштым КВН ден концертыште ончыктат. Кугурак класслаште тунемше-влак марий йылме дене диктантым возат. Эн сайын серышылан «Ямде лий» газет ден «Кече» журналым кучыктем. Тидлан тунемше-влак моткоч йывыртат да куанен шергалыт, – ойла Татьяна Алаева.
Христина ТОКПУЛАТОВА.
Снимкыште: 5-7-ше класслаште тунемше-влак.
Фотом школ архив гыч налме.
