1-9 июльышто Моско кундемысе Алабино полигонышто «Победа» всероссийский военно-спортивный модмашын финалже эртаралтын. Российын 84 регионжо гыч 14-17 ияш 1000 наре самырык еҥ чумырген. Ӱдыр-рвезе-влак строй дене коштмаште, викториныште, «Визитка команды» конкурсышто, «Огневой рубеж» эстафетыште, «Дорога победителей» модмаште мастарлыкыштым да вий-куатыштым тергеныт. Марий Элын чапшым Волжск оласе 9-ше номеран школын тунемшыже-влак араленыт. Юл кундем федерал округысо регионла гыч толшо команде-влак коклаште кокымшо верыш лектыныт.
