Шернур район Кугэҥер ял гыч Куклинмыт ешыште ик кечат книга але журнал деч посна огеш эрте. Мӧҥгыштышт кажне ийготлан келшыше книгам муаш лиеш. Нуно книгагудын ик эн чолга унаже улыт.
– Книгалан изинек шӱман улам. Мӱшкыран улмем годым кастене малаш вочмо деч ончыч але яра жапыште тӱрлӧ журналым шергалынам. А изи ньога шӱм йымалне шып колышт киен. Йоча-влакын ош тӱням ужмекышт, нунылан йомакым лудынам. Садлан кызыт Артемий эргым почеламутым писын шарнен кодеш, изложенийым сайын воза. Даша тений школыш каен. Тудат сайын тунемаш тӱҥалеш манын ӱшанем, – ойла озавате Алиса Александровна.
Ик ияш Маша изаж ден акажым эскера. Тудлан интерактивный книга-влак келшат: йомакым, почеламутым колыштеш. Ешыште шукырак рушла лудыт гынат, марий книга-влакымат ӧрдыжеш огыт кодо.
Книга дек шӱмаҥмаш еш гыч тӱҥалеш. Йоча-влак ача-авам ончен тунемыт. Кугыеҥ-влак, икшывыда дене пырля лудса, лудмо произведенийым пырля каҥашыза да йочан йодышыжлан моштен вашештыза.
