Павел Алексеевич Паймаков Н.Заболоцкий лӱмеш 2-шо номеран Шернур школышто физкультурым кокымшо ий туныкта. Урок деч вара стадионыш вашка. Тудлан «Сокол» хоккей клубым (снимкыште) вуйлаташ ӱшаненыт.
– Рвезе-влак арняште ныл гана ий ӱмбак шогалыт, кок шагат дене тренировкым эртарат. Кугурак группыш 15 йоча коштеш. Кодшо ийын изирак ийготан командым чумыренна. Тушто 12 рвезе вийжым терга, – ойла Павел Алексеевич.
«Сокол» команде кызытеш товарищеский таҥасымашлам эртара. Параньга район гыч «Пчёлы», Морко посёлко гыч «Газовик» командыла дене таҥасымаш-шамыч рвезе-влакын вийыштым тергаш сай йӧн лийыныт.
Йоча-шамычлан оҥайрак лийже манын, кумдан палыме спортсмен-влак дене вашлиймашым эртарат. «Спартак» клубын тале хоккеистше С.А.Лопарев мастер-классым ончыктен да пырля модын. Тӱҥалше хоккеист-шамычлан тиде кугу куан да пайдале урок лийыныт.
Тек «Сокол» командын шайбыже эре капкаш веле пура.
