Марий тиште кечым кажне ийын кумдан пайремлена. Теният ты пайремлан пӧлеклалтше мероприятий-влак эртаралтыныт. 10 декабрь поснак тӱвыргӧ лектышан лийын. М.Шкетан лӱмеш Марий национальный драме театрышке калык лыҥ погынен. Нуным Марий Эл Республикым Вуйлатыше Ю.В.Зайцев пайрем дене саламлен.
Йоча-влак «О, мӱкш ава гай поро шочмо йылме…» почеламутым сылнын лудмо конкурсышто мастарлыкыштым ончыктеныт. Книга ончер кумылыштым налын.
Тиште кечын эн тӱҥ ужашыже – «Марий Элын идалыкысе книгаже – 2022» республикысе конкурсым иктешлымаш. «Йоча да самырык-влаклан эн сай книга» таҥасыште А.А.Столяровын «Я живу в Марий Эл: природа родного края» книгаже ойыртемалтын. Кок томан «Марийско-русский фразеологический словарь» Марий Элын эн сай книгажлан шотлалтын. Конкурсышто 78 авторын 220 книгаже аклалтын.
«Ямде лий» газет редакций Марий Эл Республикысе туныктыш да шанче министерстве дене пырля «Йӱлам арале – тӱвырам пойдаре» республикысе конкурсым да «Ямде лий» газетым лаштыклен» викториным иктешлен. Сылнымут конкурсыш 67 паша пурен, викториныш – 41. Сеҥыше-влакым «ВКонтакте» соцкылыште «Ямде лий» – марла йоча газет тӱшкаште ончыза.
«Мунло» уш-акылым тергыше марафонышто 9 команде таҥасен. Журналист-влакын «Серызе» командышт икымше верым сеҥен налын. Тений «Марла чын возена» тӱшка диктантым кум тӱжем утла еҥ возен. Икымше верым сеҥен налше-влак радамыште «Ямде лий» газетын тӱҥ редакторжо Л.Н.Григорьева лийын. Саламлена!
