Шинчалыкым нумалше йоча-влак ий гыч ийыш ешаралтыт. Южо икшыве шинчалыкым чияш вожылеш. Кузе тыгай койыш деч утлаш? Икмыняр каҥашым Психологий да педагогике, медицине да социальный полышым пуышо «Детство» рӱдерын туныктышо-логопедше Е.В.СТЕПАНОВА пуа.
- Ача-ава, икойыш шуын, йочалан тыгай койыш деч утлаш полшышаш улыт.
- Эн ончыч шинчалыкым чияш торешланымын амалжым рашемдыман. Ала темлыме очки йочаланда йӧнан огыл?
- Йоча шинчалыкын оратаже куштылго да пеҥгыде лийшаш. Линзыже пластик гыч. Шинчалыкым йоча дене пырля ойырыман.
- Уремыште ошкылмо годым шинчалыкан еҥ-влакым ужмек, «Могай моторын коеш» манын ойлыман.
- Мультфильмласе шинчалыкан герой-влакым шарналтыман: Цыпа чывиге, Знайка, Гарри Поттер да молат.
- Шинчалыкым чийыше кугыеҥ-влакым (мурызым, артистым, молымат) примерлан конден, кӱкшӧ сеҥымашке шумышт нерген каласкалыман.
- Йочалан шинчалыкым чийдымашын эҥгекше нерген умылтарыман.
- Икшывыланда умылтарыза: шинчалыкан улмылан йолташ-влакын игылтмыштым шотыш налман огыл. Но уэш да уэш мыскылат гын, туныктышо дене мутланыман.
- Икшывылан «Тый шинчалык дене мотор, модный улат» манын чӱчкыдынрак ойлыман. Тунам йоча еҥын игылтмыжлан нигунам нелеш ок нал да кумылжо ок воло.
