Тений республик мучко йыҥгыр йӱк 246 школышто йоҥген. 85 тӱжем утла тунемше парт коклашке шинчын. Тышеч 7 тӱжем утла йоча шинчымаш тӱняшке икымше ошкылым ыштен. «Всё лучшее детям» федерал проектын «Молодёжь и дети» нацпроектше почеш тений Марий Элыште индеш школым уэмден олмыктеныт. Нунын коклаште – Руэм посёлкысо Шуко профилян лицей-интернат. Вашталтышлан, уэмдымашлан йывыртыше йоча-влак деке Шинчымаш пайремыш Марий Эл Республикым Вуйлатыше Юрий Зайцев миен.
– Тӱрыс олмыктымо деч вара школыш пӧртылаш поснак куанле, шонем. Икшыве-влак келге шинчымашым налышт манын, ятыр йӧным ыштыме. Лицейыште тунемше-шамыч физике, химий предметла дене сай лектышым ончыктат, ЕГЭ-ште кӱкшӧ баллым погат, конкурслаште, олимпиадылаште чӱчкыдын ойыртемалтыт. Ончыкыжым республикнан вузлашкыже тунемаш пурат да сай профессийым ойырен налыт манын ӱшанена, – ойлен Юрий Викторович.
Школ йоча-шамычлан кокымшо сурт гаяк. Тушто ӱдыр-рвезе влак ятыр жапым эртарат. Садлан тудым арун кучыман, улшо арверым перегыман.
Оля МАЙКОВА.
Фотом лицей-интернатын архивше гыч налме.
