Шернур район Шӱдымарий кундемеш ятыр мурызо, артист, журналист, музыкант шочын-кушкыныт. Верысе школышто тунемше-шамыч изинек шочмо йылмылан, сылнымутлан шӱман улыт. Туштак лаштыкнан геройжо Регина Мамаева (снимкыште) вияҥын. Кызыт Марисола школышто тунемеш.
– Тӱҥалтыш класс лаште уста туныктышо Софья Федотовна Рыбакова туныктен. Тудо мемнан мастарлыкнам жапыште шекланен, тӱрлӧ йӧн дене вияҥден. Мый ойлымаш-влакым возаш йӧратем. Пашам-шамыч «Ямде лий» газет ден «Кече» журналыште савыкталтыныт. Конкурслашке ушнен, сеҥыше-влак радамыш лектынам, – палдара ӱдыр.
Изинек сылнымут дене кылым кучымыжо марий йылмын моторлыкшым, куатшым шижаш полшен, келгынрак шымлаш таратен. Теве Регина шукерте огыл районышто марий йылме дене олимпиадыште сеҥышыш лектын.
– Олимпиадылан марий йылме да литератур дене туныктышо Светлана Мартынов на Максимова ямдылен. Мӧҥгыштат шке семын лончыленам. Тиде кокымшо сеҥымашем. Шӱдымарий школышто 9-ше классыште тунеммем годым икымше лийынам ыле. Шочмо йылме ава гай: ончыко вӱда, полша, кумылым нӧлта. Тудо ӱмырем мучко пеленем лиеш да чонем вӱчкаш тӱҥалеш, – ойла Регина.
Х.АЛЕКСАНДРОВА.
Фотом школ архив гыч налме
