Марий сылнымутын классикше С.Г.Чавайн дене палдарыше увер стендым Морко район Коркатово ял воктеч эртыше кугорнысо остановкеш вераҥдыме. Тушто лӱмлӧ писательын портретшым ужаш лиеш. «Ото» почеламутшым рушла да марла савыктыме. Коркатово лицейын тунемшыже Таня Суворова стендым почмо годым тиде почеламутым пеш сылнын лудо.
Тыгай стендым ыштымаште Йошкарэҥер ялын шочшыжо, чолга марий ӱдырамаш, ветеринар врач А.П.Ильинан надырже кугу. Шонымашым илышыш шыҥдараш Марий Элысе тӱвыра, печать да калык-влакын пашашт шотышто министерстве, Марий национальный конгресс, Коркатово ялшотан илем полшеныт.
