Кодшо кечылаште Чебоксар олаште футбол дене XVII йоча футбол турнир эртаралтын. Тушто Йошкар-Ола гыч «Спартак» футбол команде Марий Элын чапшым кӱкшын арален да ший лигыште икымше верым сеҥен налын. Ты командын ик эн чолга модшыжо – Йошкар-Оласе 2-шо номеран школышто тунемше Богдан Речкин. Тудо спортлан изинек шӱман. Кумшо классыш вончышо рвезе йочасад гычак бассейныш коштын. Варажым Морко район Кортасэҥер ялыште илыше кочаже Василий Иванович семынак футболлан кумылаҥын.
Сеҥымаш верч
Богданын кажне эрже зарядке гыч тӱҥалеш. Турникыште шкенжым нӧлта, моло упражненийым ышта. Тренировкыш арняште ныл гана коштеш. 2023 ийыште «Юниор» командыште модын. Монобол ден даблбол турнирыште 3-шо верым налын. Чыла танасымаштат чолгалыкшым ончыктен. Ойыртемалтше футболистын усталыкшым моло тренерат шекланен. 2024 ий апрель гыч тудым «Спартак» командыш кусареныт.
– Футбол дене ончыкыжымат кылым кучаш тӱҥалам. Тренерем Александр Михайлович Ласточкинлан кугу таум каласем. Йоҥылышым ужеш да жапыштыже тӧрлаш полша, – ойла рвезе.
Йолташ – эҥертыш
Богданын йолташыже – Илья Кудрявцев. Тудат тиде командын тале футболистше. Ныл ияшак секцийыш кошташ тӱҥалын. Таҥасымашлаште тыршен модмыжлан ятыр гана диплом, чап грамот да медаль-влак дене палемдалтын. Богдан, йолташыжым ончен, спортлан эше чот шӱмаҥын. Велосипед, самокат дене пырля кудалыштыт, шахмат дене модыт.
– Йочам спорт дене кылым кучаш изинек туныктыман. Икшыве яра жапшым пайдалын кучылт моштышаш, – ойла Богданын аваже Надежда Алексеевна. – Спорт тазалыкланат пайдале, тунеммаштат сеҥымашыш шуаш полша.
З.ТИМОФЕЕВА.
