Тений кеҥежым ик эн кугу шонымашем шукталте. «Орлёнок» всероссийский рӱдерыш, «Олимпийский» лагерьыш миен тольым. Тушко логалаш манын, эн ончыч ме Волжск оласе экологий рӱдер пеленысе «Хранители леса» школ лесничестве дене «Подрост» всероссийский конкурсышто тӱшка дене сеҥенна. Йывыртен, кужу корныш тарваненна. «Лесной подрост» смене пӱртӱсым йӧратыше ӱдыр-рвезе-влаклан йырым-йырысе тӱням вес могырым ончалаш, пӱртӱс нерген шуко оҥайым пален налаш полшен.
Кажне кече мероприятийлан поян лийын. Ме экокорно дене коштынна. Тыглай веле огыл, чыла эскеренна, вес семын ужаш тунемынна. Шинчымашым пойдарыше мастер-классше, лекцийже мыняр лийыныт! Эше пырдыж-газетым тӱшкан сӱретленна, чиялтенна — пӱртӱсым нимучашдымын йӧратымынам ончыкташ тыршенна. Икымше верым сеҥен налынна!
«Орлёнок» шинчымашым веле огыл келгемден, тыгак поро, волгыдо шарнымашым, сай йолташым пӧлеклен. Чылалан кугу тау! Кажне йочалан ««Орлёнокыш» логалаш тыланем.
Сабина ТИМОФЕЕВА.
2-шо номеран Волжск школ.
Фотом еш архив гыч налме.
Снимкыште: Сабина (шола гыч визымше) — школ лесничествын еҥже-влак да Волжск оласе экологий рӱдерын вуйлатышыже да туныктышыжо-шамыч дене пырля.
