Пытартыш жапыште соцкыллаште озадыме пий ден пырыс нерген увер чӱчкыдын савыкталтеш. Республикыште ятыр приют пашам ышта. Тылеч посна мӧҥгышкышт ик жаплан але эрелан илаш пуртышо-влакат улыт. Нунын коклаште йоча-шамыч чӱчкыдын вашлиялтыт. Оршанке район Кугунур школышто тунемше акак-шӱжарак Настя ден Лейла Мухаметовамыт, тукым шӱжарышт Ева Королёва (снимкыште) тыгай радамыште улыт.
– Ковам ветфельдшерлан пашам ыштен, авамын шӱжарже – ветеринар врач, садлан ныл йолан йолташ-влак дек йӧратымаш вӱрыштынак, очыни. 2016 ий гыч волонтёрын сомылжым еш дене шуктена. Индеш ий утла жапыште шӱдӧ наре пий ден пырыслан полшенна. «ВКонтакте» соцкылыште приют-шамычын лаштыкышкышт пурен, полышым темленна. Тыге вашкыл пеҥгыдемын, – ойла Настя.
Кызыт мӧҥгыштышт куд пий уло. Греттам «Динка» приют гыч тукым шольышт дене конденыт. Кызыт тудлан – ныл ий. Ева 2017 ий гыч суртым ӱшанлын орола. Белка ОСВВ (отлов – стерилизация – вакцинация – возврат) программе дене логалын. Маним У Торъял район гыч конден пуэныт. Бимым, пудыргышо йоланым, ик жаплан илаш пуртеныт, эмленыт. Кызыт у озам кычалыт. Эше шоҥго Астра ила. Тылеч посна кандаш пырысым ашнат. Чылан гаяк черле лийыныт. Нунымат Мухаметовмыт еш эмлен. Пий ден пырыс деч посна Мухаметовмытын ушкалышт, тунашт, кум презышт, ятыр шорыкышт, чывышт уло. Сомыл тугакат чылалан сита гынат, поро пашалан жапыштым огыт чамане.
– Янлык-влаклан полшена – кумылна нӧлталтеш. Пий-шамыч дене пырля коштын, чоным лыпландарена, утларак жапым яндар южышто эртарена. Пийым але пырысым ашнаш налына гын, нунылан мутым кучышаш улына. Озадыме янлык-шамычлан полшаш ямде улшо еҥ-влакын чотышт тек шукемеш. Тек кажне ныл йолан йолташ суртан лиеш! – ойлат Мухаметовмыт.
Христина АЛЕКСАНДРОВА.
Фотом еш архив гыч налме.
