Школьник-влакын российысе толкыныштын эртарыме тӱрлӧ мероприятийыште марий шӱлышан чолга ӱдыр-рвезе-влакым ужаш поснак куанле. Нунын кокла гыч иктыже – Советский район Кельмаксола школын 8-ше классшым тунем пытарыше Екатерина Мочалова.
Тиде толкынышко ӱдыр 6-шо классыште тунеммыж годым ушнен. Кок ий утла жапыште ятыр поро да суапле паша ышталтын. Йоча-влак школ воктене, Кугу Ачамланде сарыште вуйым пыштыше-влаклан Шӱдысола ялыште шогалтыме шарныктыш йыр арулыкым эскереныт. Туныктышо, ава, илалше еҥ-влаклан, Сеҥымаш кечылан пӧлеклалтше концертым ончыктеныт. «Шарнымаш сорта», «Шарнена, пагалена» да моло акцийышке ушненыт. Катян мураш, кушташ кумылан улмыжо усталык конкурслаште сеҥыше радамыш лекташ полша. «Сеҥымашын йӱкшӧ» районысо конкурсышто йолташ ӱдыржӧ Мадина Шарифова дене 2-шо верыш лектыныт. Активист семын РДШ-н эртарыме слётлашкат чолган ушна.
– РДШ – ӱшаным пуышо толкын. Тудо йоча жапнам оҥайын да пайдалын эртараш, вес школла гыч ӱдыр-рвезе-влак дене палыме лияш йӧным ышта. Тылеч посна ме школысо «Кече» ушемыште вияҥына. Тудын девизше: «Кече гае волгалташ, эре порым веле шараш». Вуйлатыше Рая Николаевна Рассоловалан кугу тау, – ойла Катя.
