«Туныктышо лияш – вӱрыштемак…»

Тыге ойла Татарстан Республик Агрыз район Терси селан шочшыжо А.А.Ипоева. Алина изинек чолга кушкын. 10-шо классыште тунеммыж годым икымше почеламут сборникым савыктен луктын. Тушко руш, марий да татар йылмыла дене возымо почеламутшо-влакым чумырен. Школышто тунеммыж годымак чонжылан филологий лишыл лийын. Тыгодым руш йылме ден литературым туныктышо Л.З.Мусина тудым кумылаҥден. «Лейсания Закиевнан урокым вӱдымыжым, чаткан да лывыргын кутырен колтымыжым эре эскеренам. Мыят тудын гай чолга да уста туныктышо лийшаш ыле манын, чӱчкыдын шоненам. Кеч тукымыштына туныктышо-влак эре улыт. Авам, А.С.Ипоева, Татарстан Республикын сулло туныктышыжо. Ты профессийын нелылыкшым, кӱлешлыкшым изиэм годсек сайын умыленам, ужын да шижын кушкынам. Очыни, туныктышо лияш – вӱрыштемак», – ойла аважын корныжым шуйышо Алина Алексеевна. Кужу жап шоныде, школ деч вара Елабугысо институтышко филологий отделенийыш тунемаш пурен. Студентше годым Татарстаныште С.Сулейманова лӱмеш, варажым Россий Федерацийысе А.Вознесенский лӱмеш премийла дене палемдалтын.

Актёр, сӱретче, философ…

А.А.Ипоева, тунем пытарымеке, Озаҥ олаш каен. 88-ше №-ан школышто нылымше ий пашам ышта. 5-9-ше класслаште тунемше-шамычлан руш йылме ден литературым туныкта. Йоча-влаклан оҥай лийже манын, тӱрлӧ йӧным кучылтеш. «Занятийлаште тунемше-шамыч дене могай гына рольым огына мод! Ме актёрат, судья ден адвокатат, сӱретчат, философат лийына. Урокым кажне гана тӱрлӧ семын эртарет гын, ӱдыр-рвезе-влакын тунемаш кумылышт утларак лектеш», – ойла Алина Алексеевна. 

Уста туныктышо эре ум шонен луктеш. Эсогыл интернет лаштыкыштыже филологий дене кылдалтше викторинылам эртара. Тыге йоча-влак веле огыл, ача-авашт, лаштыкыш ушнышо кумылан кажне еҥ уш-акылыштым терген кертыт.

Алина Алексеевнан ойлымыж почеш, туныктышо ушан, поро чонан, уста, чытыше да йочам йӧратыше лийшаш. Уста педагог шке предметшым веле огыл, тунемшыже-шамычымат йӧрата. Тыгодым илыш дене тӧр ошкылман. XXI курымышто ятыр профессий технике дене чак кылдалтын, но туныктышым нимогай робот але технике алмаштен огеш керт. Ты профессий ик эн неле, но уло чонет дене йӧратен ыштет гын, йоча-влаклан келге уш-акылым пуаш шонет гын, паша куштылгын кая.

Чонлан лишыл марий йылме

А.А.Ипоеван ачаж ден аваже марий улыт. Алина Алексеевна марий йылмым изиж годсек йӧрата, тудын дене куштылгын мутлана. «Вес калык коклаште кеч-мыняр ий илет, вес йылме дене мутланет гынат, шочмо йылме чонлан садак эн лишыл. Марий йылме кугезына-влак деч куснен, тудым ме палышаш, аралышаш улына. Икмыняр ий ончыч еш пушеҥгым шымлаш кумылаҥынам, шым тукымем палем. Кугезе коча-ковамын годсо тошто мурым, калык палым да молымат тений кеҥежым чумыраш шонымаш уло. Арам огыл филолог улам», – шыргыжалын ойла туныктышо.

Тек Алина Алексеевна гай чолга, уста, чон йӱлен пашам ыштыше самырык туныктышо-влак шукырак лийыт.

Снимкыште: А.А.Ипоева – 5-ше классыште тунемше-влак дене пырля.