Морко район сӧрал пӱртӱсшӧ, поро кумылан калыкше, тоштерже-влак да тулеч моло дене турист-влакым савыра. Теве Эҥерсола ялын ӱдыржє, кызыт Йошкар-Оласе 31-ше номеран школышто йот йылмым туныктышо Л.Р.Бутенина, шочмо кундемысе пӱртӱс поянлык дене калыкым палдараш шонен, проектым возен. «Туристические маршруты по историко-культурным объектам и памятникам природы Малой Родины» пашаже Российысе Молодёжный проект-влак конкурсышто сеҥышыш лектын.
– Турист-влаклан кок маршрутым темлена. Турист корно Кӱчыкэҥер ялысе М.Казаков лӱмеш тоштер гыч тӱҥалеш, – ойла Лиана Рудольфовна. – Кок маршрутшат Вончо эҥер воктеч эрта: иктыже – эҥерын пурла серже дене, весыже – шола могырым. Кугыерым, кумалтышым эртарыме Курыкым авалтыме. Мезолит (мемнан эра деч VII-VI тӱжем ий ончычсо кӱ курым) да неолит (у кӱ курым) годсо памятник-влак (акрет годсо калыкын илемышт) дене палдарена. Нуно Ердӱр ял воктене верланеныт. «Йошкар сер» пӱртӱс памятник дене палымым ыштена.
Кызыт проект почеш паша мучашышке лишемеш. Турист маршрут мучко верланыше памятник-влак пелен умылтарен возымо баннерлам келыштарыме. Йошкар сер воктене каналташлан беседкым чоҥымо. Шукерте огыл тудым ял калык, вуйлатыше-влак дене пырля торжественно почмо. Турист-влаклан у маршрут ямде.
Л.Р.Бутенина проектым илышыш шыҥдараш полшымыштлан аважлан, Эҥерсола школышто историйым да географийым туныктышо М.А.Бутениналан, М.Казаков лӱмеш тоштерым вуйлатыше Г.К.Сошиналан да чоҥышо-влаклан кугу таум ойла.
Л.ГРИГОРЬЕВА.
