Уста гармоньчо, мурызо Артур Ефремовым шарныме лӱмеш «Самырык чонетым тарвате» фестиваль-конкурс Советский посёлкышто эртаралтын. Ныл таҥас лийын: гармонь, гитар дене шоктен мурымаш, фонограмме почеш йоҥгалтарымаш да Артурын мурыжым мурымаш. Мый «Гармонем налын шокталтем» таҥасыш ушненам. Шочмо ялемлан пӧлеклалтше «Мочол сылне ялем, Пӱнчерем» мурым шке возенам да сценыште муренам. Фестиваль-конкурсын тӱҥ пӧлекше гармонь лийын. Тудым мый сеҥен налынам (снимкыште). Гран-при дене палемдалтынам. Ты семӱзгар у муро-влакым шочыкташ кугу эҥертыш лиеш манын ӱшанем. Гармоньым кажне гана кидыш налме годым Артурым порын шарналташ тӱҥалам.
Тыгай фестивальым эртарыше-влаклан кугу таум каласем. Тек конкурсын ӱмыржӧ кужу да лектышан лиеш.
Кирилл НОВОСЁЛОВ.
Шернур, Кукнур.
Фотом еш архив гыч налме.
