Йоча-влак, туштым туштем, палыза. Тиде изи янлык шӱргыначкаштыже кок мешакым нумалеш. Чын, комаголя. Рушлаже хомяк лиеш. Нуным мемнан юнкорна, 2-шо номеран Морко школышто 8-ше классыште тунемше Регина Григорьева, ашна. Тидын нерген редакцийышке почеламутымат возен колтен ыле.
– Акамын йолташ ӱдыржын лу комаголяиге шочын. Карина чаманен да кум тылзе утла ончыч иктым мӧҥгӧ конден. Но тудлан йокрок лийын, да йолташ кӱлын. Ынде коктын улыт. Мый нуным иканаште йӧратен шынденам. Ончыкыжым Алёша чӱчӱэм гай вольык эмлызе лийнем. Суртвольыкым пеш йӧратем. Кажне кеҥежым коваем дене пырля Кораксола ялыште илем да кӱтӱ пурымо годым казавача-влакым вашлияш коштам, – ойла ӱдыр.
Комаголя-влак кок пачашан «пӧртыштӧ» илат. Изи карусельыштышт йӱдшӧ-кечыже пӧрдыт. Ик коляже поро койышан, весыже осалрак. Осалже сайжым эре пуреш, магырыкта, садлан посна ойыреныт.
Мом кочкыт? Юнкорна нунылан зоокевытыште налме пырчым, коштымо фрукт-влакым пукша. Тыгак кечшудо дене сийла. Ончыл чапашт дене кучат да сӱвызен кочкыт. Сырымат пуэн онченыт.
Комаголян пӱйжӧ ӱмыржӧ мучко кушкеш, садлан нунылан эре иктаж-мом пурман. Регинан ныл йолан йолташыже-влак кызытеш клеткыштым, тошкалтышыштым «авызлат». Лӱмын пураш келыштарыме арверым налаш шонат.
Изи янлык-влак кидыш толаш иканаште огыт тунем, лӱдыт.
– Авам шукерте огыл веле поро кумыланжым кидыш толаш туныктен. Тудо кидыш налыктынеже гын, клетке гыч лекташ тӧча. Ме умылена да кучен луктына. Диваныш колтена – изи падыраш ош пушкыдо леведыш ӱмбач писын кудалеш. Ончен, чонет йывырта! – ойла Регина. – Комаголям ашнаш пайдаже уке манын ида шоно. Тудо чоным лыпландара, куаным пӧлекла. Пӧлеклат гын, окса мешакат кушкын кертеш, маныт.
Фотом еш архив гыч налме.
