Ур Маскам утарен

Марий чодыраште маска еш илен. Маска ача кече еда пӱртӱс лоҥгаште коштын. Ешыжлан мӱйым, эҥыжым да моло тӱрлӧ кочкышым конден. Ава сурт сомылкам шуктен, Мишук эргыжым эскерен. Мом йодмыжым шукташак тыршен. Маскаиге мыняр шонен, тунар мален. Тамлын кочкын, кечым модын, тӧрштылын эртарен.

Йӱран кастене омсашке Мераҥ тӱкалтен да сӧрвален йодын:

– Корнем кужу, нӧренам. Поро лийза, йӱр эртен   кайымешке пуртыза.

– Мишукна мала, теве помыжалтарет! Шайык-шинча, шке корнет дене кай! – шыдын пелештен Маска ава.

Кок арня гыч эше ик уна толын – шужен, явыген пытыше Пириге. Сӧрвален-сӧрвален, сукалтен шичшыла койын, кочкаш йодын. Маска еш тудымат поктен колтен. «Пирым йолжо пукша», – игылт воштылын Мишук.

Кечым кече поктен, тылзе эртен. Омсашке вучыдымын Уриге пералтен да шортын-шортын ойлен:

– Поро йолташем-влак, мый, укш гыч укшыш тӧрштылын, суртемым, ешемым йомдаренам. Ала корным ончыктеда?

– Шагалрак тӧрштылман. Навигаторым чӱктӧ. Авай, поктен колто! – кычкыралын Маскаиге.

Идалык почеш идалык эртен. Мишук кушкын, а аваж ден ачаже эркын-эркын шоҥгемыныт. Мардежан игечыште суртоза торашке каен да пӧртылын огыл. Маска ава ойгыраш тӱҥалын да эргыжлан ойлен:

– Мишук, ачат азапыш логалын, очыни. Тый ынде изи отыл, патыр улат. Ала кычалаш кает?

– Йӧра-а-а. Ка-а-е-ем, кычал онче-ем, – йогыжым сеҥаш тыршен вашештен Маскаиге.

Мишук корныш тарванен. Пеленже кочкышымат налын огыл: нелым нумалаш ӧрканен. Кудалын-кудалын, Мераҥым вашлийын.

– Шайыкшинча, ачамым ужын отыл? – йодын. Мераҥ Маскаигым шӧрын ончалынат, вондер коклаш пурен йомын.

Рӱмбалгаш тӱҥалын. Маскаиге умбакыже ошкылын. Тудо пеш ноен, моткоч шужен. Кож йымалан тулотым ылыжтен, кочкаш ямдылыше пире ешым ужын. Тутло пуш Мишукын нержым чыгылтен. «Ух, мӱшкыремым теме-е-м», – шке семынже шоналтен. Нунын дек лишемын, лӱдынрак ойлен:

– Пире тос-влак, мый ачамым кечыгут кычалам. Моткоч шуженам, пукшыза мыйым. Сӧрвален йодам.

Но пире-влак тӧрштен кынелын поктен колтеныт.

Маскаиге, вуйым сакен, шӱвылвӱдым нелын, умбакыже ошкылын. Кенета ву-йышкыжо пӱгыльмӧ камвозын. Кӱшкӧ ончалын – Ур.

– Йолташем, тый пушеҥге гыч пушеҥгыш тӧрштылат. Ала ачамым ужынат? – йодын.

Ур тудым поктен колтышо Мишукым пален налын гынат, тореш вашештен огыл.

– Тораште огыл сусыргышо Маскам ужынам ыле. Лишемаш лӱдынам. Ала тиде тыйын ачат лийын? Айда почешем, вараш ит код, – Ур ойлен.

Кудалын-кудалын, йӧрлшӧ пушеҥге дек миен лектыныт. Мишукын ачажак лийын улмаш. Мӧҥгӧ кузе каяш? Кӱсеныштыже смартфонжо улмым трукышто шарналтен да вашкеполышым ӱжыктен. Мишук Урлан кугу таум ойлен.

Суртоза, тӧрланымекше, Мишуклан порылык нерген кужу жап умылтарен:

– Еҥлан поро пашам от ыште гын, тыланетат нигӧ огеш полшо. Арам огыл ойлат: «Поро паша поро дене пӧртылеш, осал – осал дене». Мемнан чодыраште поро янлык-влак илат. Кажныжым пагалыман.

Тылеч вара маска еш Мераҥ, Пире, Ур да моло янлык-шамыч дене келшен, икте-весым пагален илен.

Е.ВОЛКОВА.

Медведево, Кома.