Калыкыште тыге ойлат. Кумдан палыме еҥ-влак ик паша дене веле серлаген огытыл. Мутлан, марий серызе, драматург Н.Арбан почеламутым, повестьым, пьесым серыме деч посна сайын сӱретлен, семӱзгар дене шоктен, семым возен. Руш поэт М.Лермонтов почеламутым возымо коклаште шыште гыч ненчен. Марий Турек школышто 5-ше классым тунем пытарыше Полина Щеголеват чыла шотыштат уста.
Чолга ӱдырым нимо ок чактаре, эре ончыко кая, у сомыллан тунемеш. Мастарлыкшым тӱрлӧ конкурсышто терга, волонтёр пашам шукта. Диплом ден грамотшо-влак тесте дене улыт. Нуно «Артек» тӱнямбал йоча рӱдерышке логалаш полшеныт. Полина марлат, рушлат сылнын мура. Репертуарыштыже «Шочмо ялыштем» шке мурыжат уло. «Песня – душа народа», «Самырык тукым» республикысе конкурслаште сеҥыше радамыш лектын. Тыгак «Рябинушка» йоча ансамбльыш коштеш.
Муро сценыште шкем кучаш, почеламутым лудмо конкурслаште артист койышым ончыкташ туныктен. Тылеч посна кажне шомакым чын, чаткан ойлаш кумылаҥден. Тыгай усталык «Фёдоров лудмаш», «Первые шаги» шанче конференцийлаште сеҥышыш лекташ полшен.
Полина шукерте огыл «Кипарисный» йоча лагерь гыч пӧртылын. Тидын дене мемнамат палдарен.
– Кумшо классыште тунеммем годым авам «Артек» нерген каласкален. Тушко тӱрлӧ кундем гыч йоча-влак логалаш шонат манын ойлен. Тыге мы-йынат шинчам йӱлаш тӱҥалын. Тӱрлӧ вере сеҥен, грамот-влакым иквереш чумыренам. Вара рӱдерыш логалаш йодмашым колтенам. «Артекыште» канаш мыланемат йӧн лектын. Кажне кечын занятийыш коштынна. Крым пелотрон ойыртемалтше верлаж дене палыме лийынна. Севастополь оласе тоштерышке мийымына чонеш келге кышам коден. Лагерьыште шуко у йолташым муынам. «Артекыш» эше ик гана логалнем, – ойла ӱдыр.
