Кужэҥер посёлкысо йоча сымыктыш школышто индешымше классыште тунемше Максим Антонов «Новые имена» всероссийский конкурсын лауреатше лийын. Уста баянист «Калык семӱзгар» таҥасыште ойыртемалтын.
Максим тӱрлӧ конкурсышто ятыр гана лауреат лийын. Нунын коклаште – «Молодые дарования России» российысе конкурс. Школым тунем пытарымеке, рвезе И.С.Палантай лӱмеш тӱвыра да сымыктыш колледжыш шинчымашым погаш пураш шона.
Максимым да туныктышыжо Елена Поповам черетан сеҥымаш дене уло кумылын саламлена!
Фотом Марий Эл республикысе Тӱвыра, печать да калык-влакын пашашт шотышто министерствын сайтше гыч налме
