23 августышто У Торъял посёлкышто «Творцы и хранители» еш-родо фольклор ансамбль-влакын регион-влак кокласе фестиваль-конкурсышт эртаралтын. Тушко Марий Элын тӱрлӧ районжо, Чуваший, Татарстан республикла гыч 150 наре еҥ ушнен. Нуно «Эн сай еш фольклор ансамбль», «Эн сай калык кочкыш», «Еш династий» эн сай калык арвер да сымыктыш ончер», «Мемнан еш пушеҥгына» эн сай фотоончер» таҥаслаште мастарлыкыштым ончыктеныт. «Эн сай еш фольклор ансамбль» номинацийыште У Торъял районысо тӱвыра да каныме рӱдер пеленысе «Росинка» йоча фольклор ансамбль (снимкыште) сеҥышыш лектын.
– Ансамбльыш иза, шӱжар-влак коштыт. Эше йыгыр рвезе-шамыч улыт, но нуно тазалыклан кӧра пайрем кечын сценышке лектын кертын огытыл. Тылеч посна моло ӱдыр-рвезе-влакат родо лийыт. Фестивальыште ме «Олма спас» композицийым ончыктенна. Мастарлыкнам кӱкшын аклымыштлан тауштена, – ойла ансамбльым вуй латыше Л.В.Смирнова.
Христина ТОКПУЛАТОВА ямдылен.
Фотом У Торъял районысо тӱвыра да каныме рӱдерын архивше гыч налме.
