Канде-канде теҥызыште илен улмаш Эвика лӱман изи вӱдчинче. Тудо иза-ака-влаклан поян лийын: Пылке, Йӱрга, Лумчо… Чыланыштым шотленат от пытаре. Эвика ӱжара волгалтмым, шӱдыр чӱкталтмым шӱм вургыжын вучен. Вӱдчинче кашалот Ванюш, дельфин Эчук дене модаш йӧратен. Вӱд толкынын сер деке лупшалалтмыжым куанен ончен.
Жап эртен, Эвика кушкын. Шочмо вершӧржӧ дене чеверласаш жап толын шуын. Эвика капкыл куштылеммыжым шижын да кавашке чоҥештен кӱзен. Теҥызше кӱшыч моткоч моторын койын: кумда, нимучашдыме. Тыге Эвика кавасе ош пылыш савырнен.
Эвика умбакыже каен. Лыжга йӱр тӱҥалын. Эвика Ама-зонкыш чоҥештен волен. Вӱдтолкын почеш шуко жап ийын. Мом гына ужын огыл: джунгли чодыран ошман сержым, тӱрлӧ тӱсан кайык-влакым. Тыштат изи чукай шуко йолташым муын: эҥерысе дельфин Мичум, гуппи колым, кужу пондашан сом колым…
Икана томаша лийын каен. Эвика кугу йӱкым колын. Тиде вӱдшуҥгалтыш (водопад) лийын. Толкын вӱдчинчым умбаке наҥгаен. Ик татыште Эвика капкыл куштылеммым шижын. «Мый чоҥештем!» – уло кертмын кычкыралын тудо.
Эвика угыч эркын йогышо эҥерышке логалын. Ик кечын палыме шинчал пушым шижын. Тудо шочмо мӧҥгыжым ушештарен. «Вашке мӧҥгӧ пӧртылам!» – куанен шоналтен вӱдчинче. Тиде эҥер ден кугу теҥызын ушнымо верышт лийын. Ончылно – кугу канде Атлантик теҥыз…
Екатерина ШУЧИНА.
Шернур, Пӱнчерйымал.
