Ялыште илет – таза капкылан лият

«Эх, могай сай ялыште илаш …» ­– мура самырык мурызо Дмитрий Афанасьев. Чынжымак тыге. Уремыш лектат – яндар юж, сылне пӱртӱс, кайык-влак чогыматат,  лыжга мардеж пуалеш, агытан муралта… Кызыт ятыр ялыште чыла йӧн уло: канде тулым, вӱдым пуртымо. Куанен иле! Тидым Кужэҥер район Кугорнымбал ял гыч Ельмекеевмыт еш сайын умыла.

Спорт уша

Ныл шочшан Диана Валерьевна ден Дмитрий Вениаминович 14 ий келшен илат. Суртоза Ӱштымбал школышто физкультурым туныктышылан да тренерлан пашам ышта, ончыкылык тале ечызе-влакым ямдыла. Озавате Тимур эргыж дене мӧҥгыштӧ шинча. Кугурак ӱдырышт, Лиза, кандашымше классышке вончен. Ачаж семынак спортлан шӱман. Писын куржталеш, ече дене таҥасымаште вийжым терга. Грамотшо, медаль ден кубокшо шотлен пытарыдыме! Шкетаҥаш ӱдыр-влак коклаште – эре ончылно. Ангелина кудымшо классыш коштеш. Акаж деч вараш ок код. Тыгак ече дене писын чыма. Йочасадыш коштмыж годымак куд-шым меҥгым куштылгын куржын эртен. Сеҥымашыже ятыр. Акаж дене коктын эше спорт туризм дене кылым кучат. Тений июльышто уста йоча ден самырык-влакын талантыштым вияҥдаш полшышо «Волгенче» регионысо рӱдерыште «Школа безопасности» профильный сменыште уш-акылыштым пойдареныт. Маша кокымшо классыште тунемеш. Моло семынак спортлан шӱман. Тений ГТО нормативым сдатлен да районышто икымше лийын. Тимур 1 сентябрьыште ик ийым темен.

– Спорт ешнам уша, пеҥгыдемда. Тудын деч посна ик кечымат илен огына керт, – ойлат Ельмекеевмыт.

Товар, вӱдвара полшеныт

Самырык еш ик верыште ок шого. Районышто, республикыште мастарлыкым тергыме  деч посна, российысе таҥасымашкат ушнат. Теве ӱмаште нуно 16-20 мартыште Вологодск кундем Череповец олаште эртаралтше ялысе телымсе модмашке миеныт да икымше вер дене пӧртылыныт.

– Чылаже 53 еш таҥасен. Сеҥаш куштылгыжак лийын огыл. Тушко Лиза ӱдырна дене кайышаш улына ыле. Но тудлан операцийым ыштеныт, садлан Ангелинам пеленна налынна. Кум тӱрлӧ таҥасымаш лийын. Эн ончыч чылан ече дене чыменна. Пӧръеҥ-влак – вич километрым, ӱдырамаш-шамыч – кумытым, йоча – кокытым. Вара мемнам эстафете вучен. Икшыве-влак тӱрлӧ чаракан полосаште писылыкыштым тергеныт. Тыгак мучаште капкашке мечым пурташ кӱлын. Ава-шамыч, ведраш вӱдым тич темен, вӱдвара дене нумал куржыныт. Пӧръеҥ-влаклан товар дене пырням руаш кӱлын. Кумшо таҥасымаш дартс лийын, – ойлат ача-ава.

Икымше верыш лекмышт нерген пален налмеке, куаныштлан мучаш лийын огыл. Утларак пашам ышташ кумыл ылыжын.

Ельмекеевмыт шукерте огыл вес кугу сеҥымашке шуыныт: Всероссийский ялысе кеҥежымсе спорт модмашын республикысе йыжыҥыштыже икымше лийыныт.

Паша шуко

Ялыште ик спорт дене веле илен лекташ ок лий, паша шуко.

– Тунам, ӱшкыжым, шорыкым, комбым, лудым, чывым, пулдырчым, фазаным, цесаркым ашнена. Комбо деч моло сурткайыкым пелашем аваж дене инкубатор гоч луктыныт. Пакчаштат чыла уло, кумдык изи огыл. Йоча-шамыч пеш полшат, – ойла Диана Валерьевна.

Дмитрий Вениаминович самозанятый семын тырша. Кок гектар мландеш пареҥгым шындат. Куд гектар кумдыкеш шудым ӱдат. Каналтыме семын пӱртньыкым погат. Шке жапыштыже куэ выньыкым пидын ужаленыт.

– Оксам ыштен налаш чыла йӧн уло. Кумылет веле лийже, ит ӧркане гына. Кугыжаныш тӱрлӧ семын полша. Ме, ялыште шочын-кушшо-влак, паша деч огына лӱд, – ойла суртоза.

Паша коклаште пайдалын канен моштат. Пӱртӱс лоҥгашке лектыт, волейболла модыт. Колым кучен, тамле сийым ямдылат.

  • Related Posts

    Районла кокласе олимпиадыш ушненыт

    Шорыкйол тылзе мучаште Коркатово лицейын тунемшыже-влак районла кокласе олимпиадыш ушненыт. Тыгайже икымше гана лийын. Олимпиаде Звенигово лицейын икымше вуйлатышыже Валерьян Павлович Яковлевлан пӧлеклалтын. 5-6-шо класслаште тунемше шӱдӧ наре ӱдыр-рвезе математике,…

    Спорт пайрем

    Марий Элыште эртыше каныш кечыште «Российын ечыгорныжо-2025» тӱшка таҥасымаш 43-шо гана эртаралтын да спортлан шӱман 10 000 наре еҥым авалтен. Тений тудо Кугу Ачамланде сарыште Сеҥымашлан 80 ий теммылан пӧлеклалтын.…