Эчук ден Пампалче ик верыште огыт шинче. Тиде гана, троллейбусыш шинчын, Йошкар-Оласе 10-шо номеран школышко вашкышт. Курчак ден газет пашаеҥ-влакым тӱҥалтыш класслам туныктышо Е.С.Зыкова порын вашлие. 2-шо «В» классыште тунемше ӱдыр-рвезе-шамыч мемнам моткоч вученыт. Кумло кум йоча гыч лу еҥ «Ямде лийым» редакций гоч налеш. Садлан газетын эртыме корныжо, кызытсе илышыже да пашаеҥже-влак дене палыме лияш нунылан поснак оҥай ыле. Тидыже йӱлышӧ шинчашт гыч вигак койо.
Классыште марий, руш, армян, чуваш йоча-шамыч икте-весышт дене келшен илат. Марла яндарын кутырен моштышо икшыват уло. Тиде Ваня Ефремов. Рвезын тукымжо – Параньга район Ермучаш ял гыч. Ванян марла ойлымыжым колыштын, пырля тунемме йолташыже-влак марий йылмылан кумылаҥыт. Ятыр марий шомакым палат, южышт тичмаш ойлончым ойлат. Шинчымашыштым «Марий футбол» модышышто ончыктышт. Эчук ден Пампалче дене палыме лийыч, кутыраш тыршышт.
«Ямде лий» газет тыланда мо дене келша?» – йодым. «Газет мотор, тӱрлӧ чиян. Мый кроссвордлан вашмутым кычалаш, чиялташ йӧратем», – икте вашештыш. Весе тыге каласыш: «Мыланем йоча-влакын возымо ойлымашыштым лудаш келша». Кумшо газетыште шкенжым ужнеже. Шонымашыже шукталте. Оласе йоча-влак ончыкыжымат тыгаяк чолга да марий йылмылан, газетлан шӱман лийыт, шонена.
