Ожно ик суртышто кум-ныл тукым илен. Изирак-влак кугыеҥ-шамыч деч пашалан тунемыныт, ушан ойыштым колыштын, йӱлам жаплен кушкыныт. Тачысе кечын сӱрет весе. Самырык еш посна лекташ тырша. Туге гынат тукым кокласе кыл лушкен манаш ок лий. Тудым пеҥгыдемдаш йӧнжат шуко уло.
Кушаковмыт еш
Шукерте огыл ик соцкылыште кумылым савырыше фотографийым ужым. Морко район Кокласолаште илыше Кушаковмыт «Три поколения» фотопроектыш ушненыт. Но нуно ныл тукымым ончыктеныт. Эн ончыч самырык Кушаковмыт еш дене палымым ыштем. Ава Надежда Альбертовна Кожлаер школым вуйлата, тыгак тӱҥалтыш класслам туныкта. Пелашыже Денис Александрович Коркатово кочегаркыште операторлан пашам ышта. Нуно кум икшывым ончен куштат. Кугурак эргышт, Саша, Озаҥ оласе авиационный институтын студентше. Даша ӱдырышт Коркатово лицейыште 8-ше классыште тунемеш. Кидпашалан шӱман. Пушкыдо модышым пидаш йӧрата. Тидлан труд урокым туныктышо З.П.Иванова кумылаҥда. Даша изирак класслаште тунеммыж годым «Ямде лий» газетыш чӱчкыдын возкален. Мастарлыкшым тӱрлӧ конкурс ден олимпиадыште терга. Мутлан, «Этот День Победы…» районысо сочинений конкурсышто кокымшо лийын. Географий дене районысо олимпиадыште сеҥыше-влак радамыш лектын. Дана 2-шо классыште тунемеш. Сӱретлаш йӧрата. «Шах¬маты», «Олимпиец», «Умелые руки», «Умники и умницы», «Английский» кружоклаште шинчымашыжым келгемда.
Кушаковмыт каныш кечылаште коча-кова-влак деке унала вашкат.
Марий йӱлам жаплат
Надежда Альбертовнан аваже, Галина Васильевна Крылова, Кокласолаштак ила. Тудо Эҥерсола ветучасткыште ветеринарлан ятыр ий пашам ышта. Аваже Мария Романовна Михайловалан – 93 ий. Пошкудо Овдасола ялеш шочын, тушкак марлан лектын. Ныл ӱдырлан ош тӱням пӧлеклен. Ӱмыржӧ мучко колхозышто пашам ыштен. Кызыт Эльвира ӱдыржӧ дене ила.
– Ме марий йӱлам жаплена. Мыйым ача-авам тидлан шӱмаҥденыт, нуным – кочам ден ковам. Ынде икшывем-шамычым палдарем. Коча-кова дене вашлийме годым шинчымаш шондыкыштым пойдарат. Калык йӱла пӱртӱс дене чак кылдалтын. Тыге ме мланде дене кылым, тукымнан вийжым утларак шижына. Марий пайрем годым родо-тукым дене вашлийына, йӱлам шуктена. Икшыве-влакым пайрем радам дене палдарена. Нунат ончыкыжым шке йочаштын ушышкышт шыҥдарат манын ӱшанена. Теве тиде фотомат Ӱярня пайрем годым ыштенна. Тек ача-авана, коча-кована-шамыч таза лийыт да шокшо кумылышт дене чоннам кужу жап ырыктат, – ойла Надежда Альбертовна.

Христина АЛЕКСАНДРОВА.
Фотом еш архив гыч налме.