Ик кечын Люба ковам ден пошкудо Галя ковам торык когыльым ышташ тарванышт. Ятыр жап воктенышт ончен шинчышым. Мыйынат полшаш кумылем лекте. «Айста мыят ыштен ончем», – манам. Мыланем мом да кузе ыштышашым, кузе тӱрлышашым умылтарышт. Йыргешке форман руашыш когыльо кӧргым пыштен пуышт, тӱржым кузе кадырташ кӱлмым ончыктышт, мый эркын-эркын тӱрлаш тунемам. Иканаште ыш лек. А вара тӱрлымӧ кажне когылем моторрак да моторрак лекташ тӱҥале. Чо-о-от куанышым. Люба ковам ден Галя ковамат йывыртышт, мокталтышт. Торык когыльына моткоч тамле лие.
Мария МАМАЕВА.
Йошкар-Оласе 23-шо номеран школ.
