19 июльышто «Марий Эл» ий полатыште Марий Эл Радио лӱмгече концертшым эртарен. Тушко 2500 еҥ ушнен. Концертым ятыр лӱмлӧ артист, куштышо да мурышо коллектив сӧрастареныт. Тиде пайремыште радио дене пеҥгыде кылым кучышо-влакым саламленыт. Билет почеш пӧлекым модын налше-шамычым палемденыт. Нунылан Марий Эл Радио 20 тӱрлӧ пӧлекым ямдылен.
Лӱмгече концерт «Марий» виян муро композиций дене тӱҥалын. Тудлан мутым радион тӱҥ редакторжо Владимир Матвеев возен гын, семым уста семмастар Сергей Пчелкин келыштарен. Тушто марий калыкын ожнысо семӱзгарже-влак: олымшӱвыр, шӱвыр, кӱсле, тӱмыр, ковыж, тӧтыретпуч – йоҥгеныт. Тиде муро марий улмына дене кугешнаш таратен. Солист-влак Россий Федерацийын сулло артистше Иван Смирнов, М.Шкетан лӱмеш Марий кугыжаныш драме театрын актержо Иван Соловьев, изи рвезе Артем Ягодаров кум тукымым ончыктеныт.
Изинек мурсемлан шӱман
Артем Ягодаров Марий Эл Радион эртарыме концертлаштыже ик гана веле огыл усталыкшым ончыктен. «Идалыкысе муро – 2023», «Идалыкысе муро – 2024» фестивальлаште коча-кова, тыгак еш нерген мурен. Тудо Йошкар-Оласе 17-ше номеран школышто тунемеш, 5-ше классыш вончен. Рвезын эн кугу йолташыже – гармонь. Марий йӱла, марий муро деке кумылан кушкеш. Тидлан тудым ешыже изинекак шӱмаҥден.
– Сценышке ик гана веле огыл лектам гынат, кажне гана тургыжланымаш уло. Марий Эл Радион лӱмгече концертыштыжат тыгай шижмаш лийын. Адакшым тыгай виян артист-влак дене пырля мураш, ик сценыште шогаш – моткоч кугу пиал. Тиде муро мыланем моткоч келшен, садлан чот ямдылалтынам. Авамат мыйын верч пеш тургыжланен, – ойла Артем.
Эртыме корно
Марий Эл Радио 2005 ий 1 июльышто шке пашажым тӱҥалын. Тудым ыштымашке кугу надырым Михаил Васютин, Андрей Чемышев, Наталья Пушкина, Юрий Русанов, Эрик Юзыкайн пыштеныт. 2005-2015 ийлаште Марий Эл Радион тӱҥ редакторжо Наталья Пушкина лийын, тачысе кечын тиде пашам Владимир Матвеев виктара.
Илыш дене тӧр
Эн ончыч радио кум шагат дене йоҥген гын, кызыт – сутка мучко шке колыштшыжо-влак дене пырля. Эсогыл эфирыште мо ышталтмым ончаш йӧн уло. Марий Эл Радио эре пырля лийже манын, приложенийым келыштарыме. Тидын дене тораште илыше-влакат пайдаланат.
Кажныжлан шерге
Марий Эл Радио пӱтынь илышым авалта: йӱлам, тӱвырам, историйым, айдемым. Тудын пашаж дене кылдалтше программе-влак эфирышке лектыт. Радио пашаеҥ-шамыч ой-каҥаш денат полшат. Марий Радион полшымыж дене ятыр мурызо икымше ошкылым ыштен да кызыт калыкыште пагалымашым сулен налын. Тиде Йорга Каче, Сергей Пакеев, Вадим Краснов, Виктория Мочалова да молат. Фондышто куд тӱжем утла муро уло.
Марий Эл Радион ешыже самырык вӱдышӧ-влакым йырже чумыра. Нуным ямдылымаште шкежат тырша. Радиошто йоча-шамычлан пӧлеклалтше программе-влак йоҥгат. «Онар тукым» передаче ятыр ӱдыр-рвезылан ончыкылык корным почын. Нунын кокла гыч Егор Федоровым, Талвий Абрамовым палемдаш лиеш. Кызыт «Ямде лий» дене йолташ лий» передаче самырык тукымлан арня еда пӧлеклалтеш. Тудын гоч газетын пашаже, илышыж дене палыме лияш йӧн уло. Уста ӱдыр-рвезе-влак дене палдара, поро ден осалым, чын ден шоям ойыраш полша. Ой-каҥашым темла, газетыште савыктыме, шонаш таратыше сылнымут пашашамычым йоҥгалтара.
Икманаш, кажныже, чонжылан лишыл программым муын, радион поро йолташышкыже савырна. Марий Эл Радиолан кажне колыштшыжо шерге. Ик еш семын ваш келшен, ончыкыжымат кугу пашам шукташ лиеш.
Жанна ФЕДОРОВА.
Валерий Поликарповын фотожо.
