Марий пӧръеҥ-влак шӧртньӧ киданак улыт. Икте окнасергам пӱчкеда, весе уа гыч корзиҥгам але молым пидеш, кумшо тракторым пога, нылымше кызытсе илышлан келшыше арверым шкеак шонен луктеш да калык коклаште шаркала. Пытартыш тӱшкашке лаштыкнан унаже, Йошкар-Ола гыч Кирилл Милютин (снимкыште – Арсений эргыж дене), пура. Тудын «Построй свой город. Деревянное государство» проектше «Родная игрушка» всероссийский конкурсышто Марий Элын чапшым арала.
– Кирилл Геннадьевич, кидпашалан изинек шӱман лийында?
– Мый ялысе рвезе улам. Пашалан изинек туныктеныт. Школышто труд урокышто тӱрлӧ арверым ышташ тунемынна. Пашам-влакым конкурслашке чӱчкыдын колтеныт, сеҥышыш ятыр гана лектынам. Йоча жапем куштылгыжак лийын огыл: Совет Ушем шаланыме жапыште кушкынам. Мый пудыргышо модыш-влакым пластилин дене ачаленам. Тоя да пластилин гыч салтак-влакым ненченам. Книгагудышто «Сделай сам» журналым налын, шукылан тунемынам.
– Те кызыт ойыртемалтше конструктор-влакым ямдыледа. Ты сомыллан кузе кумылаҥында?
– Конструктор мыланем эре келшен. Кандаш ияшем годым пӧрткоклаште кӱртньӧ конструкторым муынам. Тудден, очыни, эше ачам модын. Тушто икмыняр изи ужаш ситен огыл, да кузе погымо нерген уверымат верештын омыл. Мый икмыняр шагат дене поген шинчылтынам. Ситыдыме ужаш олмеш полдышым, воштырым, изи паҥгам, пластилиным кучылтынам. Латик ияш улмем годым «Лего» конструктор дене палыме лийынам. Ола гыч ялыш уналыкеш толшо рвезе шке тошто наборжым пӧлеклен коден ыле. Туштат деталь-влак я йомыныт, я пудыргеныт улмаш. Кугу лиймеке, конструкторым ышташ шонен, мастаргудым почынам. Но лектын огыл, вара сувенир сынан арверым ыштенам. Эргым шочмеке, тудлан модышым шке ыштыме шуын. Эн ончыч пу гыч погремушко-грызунокым ямдыленам. Янлыкым сӱретлыман кугу ужашан пу пазлым келыштаренам. Вара уэш конструктор дек пӧртылынам. Тыге шонымаш почеш шонымаш толеш.
– «Построй свой город. Деревянное государство» проектда дене палдарыза.
– Ты конструктор набор – кугу тӱня. Тушто кум серий уло: «Крепости деревянного государства» (5 набор), «Осадные орудия деревянного государства» (4 набор) да «В мире зверей» (2 набор: пире ден маска еш-влак). Тыгак салтак-влакым ыштенам. Ончыкыжым Кокла курым годсо олам ончыктынем. Мутлан, фермым, мардежвакшым, пекарньым. Кажне пӧртын шке илышыже лиеш. Тыгай конструктор йоча-шамычым физике закон-влак дене палдара, садлан пеш пайдале.
– Эргыдамат кидпашалан шӱмаҥдеда?
– Ныл ият пелаш Арсений эргым – мыйын тӱҥ экспертем, критикем. Конструкторым эн ончыч тудо терга, модын онча. Арсенийлан келша гын, тыгайымак шуко ыштем. Огеш йӧрӧ гын, эргымлан келшымешке вашталтылам, тӧрлем. Тудлан сай пример лияш да шинчымашем, моштымашем пуаш тыршем.
– «Родная игрушка» конкурсышто тыланда могай акым пуэныт?
– Конкурс 1 сентябрьыште мучашлалтеш. Финалыш, конструктор-влакын таҥасышкышт, 15 еҥ логалын. Нине еҥ-шамыч коклаште мыят улам, тидат сеҥымаш. Тугеже жюри еҥ-влак пашамлан кӱкшӧ акым пуэныт. Финалыштат кӱкшӧ лектышлан ӱшанем.
– Сеҥымашым тыланем!
– Тау.
Христина АЛЕКСАНДРОВА мутланен.
Фотом еш архив гыч налме.
