Йошкар-Олаште «Юный радиолюбитель» усталык ушем визымше ий пашам ышта. Самырык тукымым радиотолкын тӱня дене «Союз радиолюбителей России» мер организацийын Марий Элысе пӧлка вуйлатышыже Александр Геннадиевич Баданов палымым ышта. Ӱдыр-рвезе-влак арнялан кок гана погынат, эфирыш лектыт да таҥасымашлан ямдылалтыт.
– Радиоспортым Всероссийский спорт реестрыш пуртымо. Тудо 12 дисциплиным уша. Кажныже ойыртемалтше: иктыште кӱчык (КВ) да чот кӱчык (УКВ) толкынышто радиокылым верештман гын, весыште компас да карте почеш радиопередатчикын верланымыжым муаш кӱлеш. Морзен азбукыжым кажныже палышаш. Тиде радиоспортын тӱҥ йылмыже, – ойла Александр Геннадиевич.
Вӱргечын йоча-влак шинчымашыштым келгемдат, эфирыш лектыт, электронике дене пашам ышташ тунемыт. Шуматкечын шукыж годым тӱрлӧ таҥасымаш эртаралтеш. Ушемын тунемшыже-влак чӱчкыдын сеҥыше радамыш лектыт, кугыеҥын 1-ше, 2-шо да 3-шо спорт разрядшым пеҥгыдемдат. Шукерте огыл Анна Александрова ден Данила Василенком (снимкылаште) радиоспорт дене Российысе сборныйын командышкыже кандидат радамыш пуртеныт.
Тыгак ӱдыр-рвезе-влак радиопередатчикым, антенным да моло арверым тӧрлаш да туддене пашам ышташ тунемыт. Радиом йӧратыше-шамыч лӱмын ойырымо диапазонын частотажым кучылтыт. Кажне радиостанцийын шке позывнойжо уло. «Юный радиолюбитель» йоча радиостанцийын – RD4SB. Вич ий жапыште икшыве-влак 100 наре эл дене 7000 чоло радиокылым ыштеныт. Кажныже ушемыште лӱмын вӱдымӧ электрон журналеш возалт кодын. Антарктидысе «Прогресс» станцийыште пашам ыштыше полярник-влак дене кылдалтыныт. Ончыкылыклан эше ик кугу шонымаш уло: Тӱнямбал космический станций дене радиокылым ышташ.
Мый радиоспортышто визымше ий улам. Эн ончыч ты спорт самырык тукым коклаште кумдан палымыла ыш чуч. Но кажне таҥасымашке ушнымеке, ты шонымаш йомын. Россий мучко тынар ушан, оҥай да поро кумылан ӱдыр-рвезе-влак улыт улмаш! Эфирыш лекмеке палет – кажныже тыйым пагален вашлиеш. Мемнан радио ешна тӱня мучко шарлен, – ойла Анна Александрова.
Катя СЕРГЕЕВА.
Фото-влакым еш архив гыч налме.
