Башкортостан Республик Уфа оласе «Калейдоскоп» усталык пӧрт пеленысе Рушарня школышто тӱрлӧ калыкын икшывыже-влак келшен илат. Тушко 4-18 ияш 92 ӱдыр-рвезе коштеш. Нунын коклаште марий-влак улыт. Йоча-шамычым марий шӱлышеш туныктышо-влак С.Я.Микишева ден В.В.Ганеева куштат.
Ӱдыр-рвезе-влакым марий йылме да сылнымут, марий калыкын тӱвыраже, йӱлаже, фольклоржо, семӱзгарже-влак дене палдарат. Йоча-шамычлан шочмо йылмым тунемаш оҥайрак лийже манын, марий калык модыш дене модыктат.
– Модыш гоч йоча поро деч осалым ойыраш, шкевуя пашам ышташ тунемеш. Пеҥгыде капкылан кушкеш. Модыш-влак марий калык йӱла дене чак кылдалтыныт, садлан модмо деч ончыч йоча-шамычым палдарена, – ойла Светлана Яковлевна.
Рушарня школышто чыла гаяк марий пайремым пайремлат, концертым, ончерым эртарат. Кумдан палыме серызе-влакын юбилейыштлан пӧлеклалтше сылнымут ка-сыште почеламутым марла сылнын лудыт. Мастарлыкыштым оласе, республикысе конкурс ден фестивальлаште ончыктат. «Шочмо кундемысе калык-влакын йомакышт» оласе усталык конкурсышто сеҥышыш лектыныт. «Салам, салам, йомак!» регион-влак кокласе конкурсышто ойыртемалтыныт. Шорыкйол, У ий пайремлашке еш дене ушнат.
– Еш кугу верым налеш. Икшыве ача-аважым ончен кушкеш. Ешыште марий шӱлыш озалана гын, йоча руш кузе лийын кертеш?! – ойла Валентина Вячеславовна.
