Пакчаштына кок теплице деч посна эше 26 йыраҥыште кушшо тӱрлӧ пакчасаска мемнам куандара. Рок йымаке нӧшмым уралтен веле, саска ок шоч. Поян лектышым налаш, ой, мыняр тыршыман! Мландым пушкыдемдыман, шӱкшудым кӱрман, вӱдым шавыман – кеҥеж мучкылан паша сита. Ик кечын ешна дене 26 йыраҥнам шӱкшудо деч эрыктышна. Пакча волгалт кайыш. Кочам тыге ойла: «Кӧ мландым шымата, тудым мланде чамана, поян саскам пӧлекла». Кызыт мыйын тыгай паша: шӱкшудо лекме почешак кажне йыраҥым эрыкташ. Йыраҥет ару – саскат тӱвыргӧ, чонет куаныше.
Даша СОШИНА.
Морко, Купсола.
