Йомак
Пасу тӱрыштӧ илыше Кужывоч коля, йӱр йӱрмым ончыде, волгыжмеке, вигак кынеле. Молгунамсе семын, чылдырий турий дене пырля муралташ манын, тӱжваке куржын ыш лек. Йӱрын выр-выр-выр йӱкшым колыштын, окна деке лишеме. Чаршам кораҥден, пӱртӱсын вӱдыштӧ йӱштылмыжым икмагал эскерыш. Пеледышан шудо коклаште, чарныде, мардеж куржталыштеш. Тудо, лышташлам рӱзалтен, вӱд пырчым ӱлыкӧ шыжыктен йоктара.
Кужывоч, пасу покшелне илыше кокаж деке каяш шонымыжым вашталтен, эр кочкышым ямдылаш пиже. Тудо аныклен кодымо таршӱрашым лукто. Коҥга тулым ылыжтен, келге салмашке шӧрым оптале. Шӧр шолаш пурышат, озавате мушмо таршӱрашым да шинчалым чывыштен пыштыш. Колян пучымышым пудыратен шогылтмо жапыште омсам тӱкалтыме йӱк шоктыш. Озавате вурт лийын кайыш. Йӧра эше Кужывоч йӱдлан омсажым тӱкӧ дене чараклен! Уке гын тыгай ночкышто кошташ йӧратыше чонанет, нимом шотыш налде, пӧртышкӧ кроп пуренат шогал кертеш! Кужывоч, тӱрлым шонкален, «Кӧ тушто?» манын йодо. Кокажын йӱкшым колмеке, келгын шӱлалтен, омсам почо. Кужу сур мыжерым чийыше кокаже, омсалондемым вончыде, йӱр авыртышыжым почкалтен, Кужывоч ӱмбаке вӱд пырчылам шыжыктен, пыльге шыргыжале. Озавате ны саламлалтмет, ны мочет, кочкышым шолтымыжым шарналтен, коҥга деке содор куржын, пучымышым пудыраташ пиже. Кока ярагида толын огыл, шӱрашан мелнам конден. Уремыште шургышо йӱр йӱкым колыштын, Кужывоч ден кокаже, ӱстелтӧрышкє лакеммеке, пучымышым кочкыч, мелнам авызлышт.
С.ГРИГОРЬЕВА-СОТО.
