Йоча-влак икмыняр ий ончыч курчак, машина, сылне, чоным куандарыше тӱрлӧ пушкыдо модыш дене модыныт гын, кызыт сӱрет вашталтын. Ял я ола урем дене ошкыл эртышыла, Хаги Ваги модышым шӱеш пижыктыше йоча-влакым ужаш лиеш. Эсогыл Хаги Ваги тӱрлӧ тӱсан да тӱрлӧ лӱман: Киси Миси, Силли Билли, Ванк Панк да ятыр молат. Кум лукан вуян, шучко шинчан, умшам карыше, пӱсӧ пӱян. Тидын нерген тӱрлӧ йодышым рашемдаш шонен, психологий шанче кандидат, доцент Т.Н.ГОЛОВАНОВА (снимкыште) дене мутланышна.
– Татьяна Николаевна, ӱдыр-рвезе-влак сылне мо-дышым шучко модышлан молан алмаштат? Бар-бим, чапле машинам ӧрдыжыш молан кораҥдат? – Йоча-влак икте-весыштым ончат. Икте Барби дене модеш гын, тудланат тыгай курчак кӱлеш. Кидыште машина гын, весат кудалнеже. Шучко модышым ужыт – налын пуаш йодыт. Кызытсе икшыве-влак вес курымышто шочшо улыт, садлан моторлыкым вес семын ужыт. Мотор чуриян модыш-влак оҥай огытыл. Кажне арверыште пайдам муын моштыман. – Хаги Ваги йоча-влакым мо дене сымыстара? – Ме, кугыеҥ-влак, «страшилке» манмым йӧратена. «Лӱдмаш пӧлемыш» пурена, аттракционыш каена. Йоча пагытым шарналташ гын, йомакым каласкалена ыле: «Шеме деч шем олаште, шем пачерыште шем ӱпан изи ӱдыр илен…» Шоналташ гын, тунам мыланна шучкынат чучын огыл. ™дыр-рвезе-влакат икте-весыштлан тӱрлӧ шучко историйым каласкалаш йӧратат. Тыге нуно лӱдмыштым тӱжваке луктыт манаш ли-еш. Садлан Хаги Ваги дене модмышт годым шучко деч лӱдмым чарнат. Шкешотан пайда уло. Туге гынат ача-ава-влаклан тӱткӧ лийман. Модышын мо дене келшымыж нерген икшыве деч йодман. – Хаги Ваги икшывын чонжым огеш эмгате? – Йоча «Авай, Хаги Вагим налын пу» манеш гын, тореш лийман огыл. Тудын дене модмо деч вара икшывын вашталтмыжым эскерыман. Тургыжланышыла, лӱдшыла коеш, сайын огеш мале гын, кораҥдыман. Школышто тунемше-влакын психикышт пеҥгыдем шуын. Нунын верч колянаш амал уке, шонем. Йочасадыш коштшо-влак дене тӱткырак лийман.
Л.И.АЛЕКСЕЕВА, туныктышо (Йошкар-Ола):
– Мыйын вуйлатыме икымше классыште кумло йоча гыч кум йочан тыгай модышыжо уло. Кок икшывылан тиде йӧршын оҥай огыл, кидышкыштат огыт нал. Икте эре модеш: ӧндалеш, шӱйышкыжӧ сака. Тыге уремышке лектеш. Шуко ача-авалан тиде шучко «янлык» огеш келше. Мыланемат. Мыйын шонымаште, тыгай модыш йочам куандарен, шӱм-чонжым, уш-акылжым пойдарен огеш керт.
С.Ю.АНТОНОВА, Шернур посёлкысо «Сказка» йочасадын воспитательже:
– Хаги Ваги – ик модышын геройжо. Модыш фабрикын сюжетше почеш, аварий лиеш, да Хаги Ваги монстрыш савырна. Жапыштыже от курж гын, тудо тыйым кочкеш. Тиде пеш шучко персонаж. Ача-ава-влак тидын нерген огыт шоналте, очыни. Йоча-влак тудын дене куанен модыт гынат, модыш чоныштлан эҥгекым ыштен кертеш, шонем. Икшыве-шамыч чын моторлыкым ужын мошташ огыт тунем. Тыгай модышым налме деч ончыч сайын шоналтыман.
Е.В.ГОДУНОВА, «Кугарня» газетын корреспондентше (Йошкар-Ола):
– София ӱдырем налыктен ыле. Кызыт огеш мод. Шинчажым луктын шуэн. Ынде коробкаште кия. Хаги Ваги мыланем шучкын коеш. Лучо тек Российыште ыштыме мотор курчак дене модеш.
