1-2 октябрьыште Коми Республикысе Помоздино селаште туныктымо интенсив эртаралтын. Тушко Марий Элысе, Удмуртийысе да верысе блогер ден тунемше-влак погыненыт. Школышто вич направлений дене пашам ыштенна. Клипмейкинг дене палыме лийынна. Тиде клипым возымаш, тудым муро полшымо дене сӧрастарымаш. Усталык шӱлыш «Хромакей» ден «Фотодело» студийлаште озаланен. «Хромакей» шомакым икымше гана колыда, очыни. Тиде фонлан ужар але канде тӱсым кучылтмаш. Сӱретым программе полшымо дене вашталташ лиеш. Мутлан, тудым Париж уремыш савырен кертына. Тыгак ме вияш эфирым чын вӱдаш, интервьюм налаш тунемынна. Икманаш, шуко оҥайым пален налынна.
Дмитрий ВЕДЕНЬКИН.
1-ше номеран Шернур школ.
