Мый Георгий Ефрушын шочмо Макарсола ялешыже шочын-кушкынам. Мемнан суртна писательын пӧртшӧ воктенак шога. Шарнем, изиэм годым суртыштышт Мани бовой шкет ила ыле. Тудыжо Георгий Захаровичын Веня шольыжын ватыже лийын. Мый акам-шамыч дене пырля тудын деке кӱварым ӱшташ, вӱдым нумалаш полшаш коштынна. Мани бовой мемнам сад-пакчаже гыч тамле шопке олма дене сийлен.
Г.Ефрушын мӧҥгыштыжӧ шуко книга лийын. Жап эртымеке, Ефремовмыт еш книга-шамычым школлан пӧлеклен. Мани бовой книгалам мыланнат пуэн. Икана мый книга-влак коклаште кӱрен коман тошто блокнотым муынам. Кӧргыштыжӧ чернила дене пеш моторын возымо ыле. Мыланем блокнот чот келшен да шкаланем налынам. Модын коштын, ял ву-йышто йомдаренам. Кычалынам, но муын омыл. Тошто блокнот Георгий Ефрушын лийын манын, жап эртымеке умыленам. Йоча ушем дене арален моштен омыл. Тидлан шкем кызытат вурсем.
Н.ЛАВРЕНТЬЕВА.
