Оля ГАВРИЛОВА – Киров кундем Малмыж район Пӱкшэҥер книгагудын ик эн чолга унаже. Ӱдыр кажне кечын гаяк урок деч вара тушко корным тапта. Оля приключений сынан произведенийым лудеш. Йӧратыме авторжо- влаклан Ч.Диккенсым, Ф.Ставиногам шотла. Ӱдырлан поэзий моткоч келша. С.Есенинын, М.Цветаеван, Й.Кырлан почеламутыштым куанен лончыла.
– Мо нерген лудмемым мондаш огыл манын, мый дневникеш герой-влакын лӱмыштым, произведенийын сюжетшым, тӱҥ шонымашыжым кӱчыкын возем. Лудаш тӱҥаламат, ушем дене вес тӱняшке куснем, чонем дене герой-влакын илышышт дене илем. Нунын шижмашышт, шонымашышт пуйто мыйын улыт. Книгам лудмо дене шомак шапашна пойдаралтеш. Ме шонымашнам моторын, яндарын, чын ойлен кертына. Шуко лудат гын, шуко палет, – ойла Оля.
