Морко район Арын школ виян спортсмен-шамычым ямдылыме дене ожнысек ойыртемалтеш. Школышто ятыр таҥасымаш эртаралтеш: ечызе-влак коклаште А.И.Степановым шарныме лӱмеш кросс дене Морко районын первенствыже, Рошто мунчалтымаш, Йӱштӧ Кузызан пӧлекшылан шахмат турнир да ятыр молат. Спортсмен-влак Матвей Егоров, Денис Александров, Артём Терентьев, Настя Новикова тренерышт С.В.Иванов дене телым изин-кугун вученыт. Лум вочмеке, вигак ече ӱмбак шогалыныт.
– Ечызе-влак телым веле огыл, кеҥежымат капкылыштым пеҥгыдемдат. Кеҥежым ораван ече дене мунчалтат. Зеленый Дол, Волжск, Ульяновск олалаште ечероллер дене таҥасымашлаште вийыштым тергеныт. Ий мучко лап возын тыршат, канаш жап уке, – ойла Сергей Викторович.
Лектыш изи огыл. Ӱдыр-рвезе-влак «Пионерская правда» газетын призше верч ече дене республикысе таҥасымаште кажне ийын ойыртемалтыт. Озаҥ олаште эртаралтше 47-ше ече марафонышто, Советский район администрацийым вуйлатышын кубокшо верч, Шупашкар олаште «Заволжская снежинка», Кужэҥер район Коҥганур школын выпускникыштын, спортын мастерыштын, призышт верч таҥасымашлаште сеҥышыш лектыныт.
Спортсмен-влак кугу кӱкшытыш шунешт: кумдан палыме ечызе, олимпиадыште ятыр гана сеҥыше Александр Большунов гай лийнешт. Шонымашышт шукталтше!
