Пӧрткӧргӧ. Книга полкышто «Ямде лий» газет ден «Кече» журнал кият. Трукышто икте-весышт дене ӱчашаш тӱҥалыт. «Ямде лий», оҥым кадыртен, пӧрт покшеке лектын шогалешат, шкенжым эй, мокта, эй, мокта:
– Мыйым марий йоча-влак арня еда вучат, ик шомакым, эсогыл ик буквам кодыде, кажне лаштыкем лудыт. Мый икшыве-шамычлан куаным кондышо газет улам.
– Кӱлдымашым ит ойлышт! – кычкырал колта «Кече» журнал.
– Мыйымат йоча-влак эре вучат. Кидышкышт налын, ик лаштыкым кодыде шергалыт. Марий Элыште веле огыл, моло кундемыште илыше-шамычат эре куанен лудыт.
Ты ӱчашымашым изи ӱдыр ятыр жап колышт шога. Чытен кертде, коклашкышт пурен пелешта:
– Те шкеат сайын паледа: ме, марий икшыве-влак, «Ямде лий» газетымат, «Кече» журналымат чон вургыж вучена да, кидышкына налмеке, моткоч куанена. Шочмо йылмына дене лекше газет ден журналла марий еҥлан моткоч кӱлешан улыт. Тендам лудмеке, шкеат возкалаш кумылаҥына. «Ямде лий» ден «Кечылан» умбакыжат ик кӱкшытыштӧ кече гаяк волгалтын илаш тыланем. Лийже тыге, лач тыге!
Юлия ГРИГОРЬЕВА.
Морко, Волаксола.
Э.Ямбаршеван сӱретше.
