Звенигово районысо «Движение Первых» толкынын чолга еҥже Константин Павлов Байконурышто космический ракетым колтымым шке шинчаж дене ужеш. Тудо да эше чумыр Россий гыч 88 сеҥыше «Космическая экспедиция Первых» всероссийский проектын кок этапыштыже кӱкшӧ лектышым ончыктеныт. Таҥасымашын тӱҥ призшым – «Байконур» космодромыш каяш путёвкым – сеҥен налыныт. Ӱдыр-рвезе-влак тестлан вашмутым пуэныт, сандалыкыште космический шӱкшакым кораҥдыме шотышто творческий проектым возеныт. Д.Ф.Устинов лӱмеш «ВОЕНМЕХ» Балтийский кугыжаныш технический университетын экспертше-влак эн сай паша-шамычым ойыреныт. Константинын проектшат ты радамыш логалын.
Л.НИКОЛАЕВА ямдылен.
Фотом Марий Эл Республикысе Образований да науко министерствын сайтше гыч налме.
