2024-2025 тунемме ийлам иктешлен, Марий Эл Республикым Вуйлатыше Юрий Зайцев тунемше-влакын всероссийский олимпиадыштын иктешлыше йыжыҥжын 7 призёржым, этнокультур предметла дене регион-влак кокласе олимпиадыште 12 сеҥышым, Юл кундем федерал округысо интеллектуал олимпиадыште ойыртемалтше 4 ӱдыр-рвезым да наставникыштым саламлен. Нунылан Марий Эл Республик Правительствын грантшым кучыктен. Тыгаяк пӧлек дене всероссийский олимпиадын регионысо этапыштыже сеҥышыш лекше 39 тунемше да этнокультур предметла дене республикысе турышто ойыртемалтше 11 икшыве палемдалтыныт.
Сеҥымашышт дене куандарыше ӱдыр-рвезе-шамыч коклаште Волжск оласе лицейыште 7-ше классым тунем пытарыше Алексей Никифоров лийын. Тудо математикылан, физикылан да информатикылан утларак тӱткышым ойыра. Тений 7-ше классыште тунемше-влаклан физике, астрономий да информатике дене республикысе олимпиаде эртаралтын. Алексей физике да астрономий дене сеҥыше лийын. Пӱсӧ уш-акылан рвезылан пӧлек шотеш «Сириус» тунемме рӱдерыш ӱжмашым кучыктеныт.
— Рудерыште 1 гыч 22 апрель марте лийынам. Ме тушто тунемынна, экскурсийлаш коштынна, Сочи паркысе аттракционышто жапым эртаренна, — ойла Алексей. — Туштак физике дене всероссийский олимпиадым возенна. Призёрыш лекташ икмыняр балл ситен огыл гынат, шулыкаҥын омыл. Мыйын чылажат — ончылно.
Мӧҥгыжӧ пӧртылмеке, Алексей вес кечынжак астрономий дене всероссийский олимпиадышке ушнен, кумшо верым сеҥен налын.
-Физике дене олимпиадылан ямдылалташ туныктышем Елена Владимировна Тимофеева полшен. Ме пырля заданийлам лончыленна, решатленна, — палдара Алексей. — Астрономий дене ямдылалтме годым еш кугу полышым пуэн: авам эҥертышем лийын, а кочамын пӧлеклыме энциклопедийже шинчымашем пойдарен.
Кеҥеж каныш гынат, рвезе жапшым арам ок эртаре. Лицей пеленысе «Гаудеамус» лагерьыште программирований, робототехнике, математике да естественно-научный дисциплине-влак дене шинчымашыжым пойдарен. У тунемме ийлан ямдылалтеш.
Катя Сергеева.
Марий Элым Вуйлатышын пресс-службыжын фотожо.
