9-14 июльышто Йошкар-Ола воктенысе «Пÿнчерла» тунемме да тренировкым эртарыме базыште Союзный государствын тунемшыже-влаклан туризм слёт эртаралтын. Тушко Россий да Беларусь гыч 370 ÿдыр-рвезе ушнен. Чылаже – 36 команде. Марий Элын чапшым кок команде арален. Йошкар-Олан да Брест кундемын командышт эн виянлан шотлалтын.
Кӧ тыгай турист? Вачыште – кугу котомка, ик кидыште кумдык дене палдарыше карт, весыште – тоя. Шинчаончылно тыгай еҥ «сÿретлалтеш». Тудо, шокшо-йÿштым ончыде, корныш тарвана, пÿртÿсыштӧ кана, кумдыкым шымла, тулото ÿмбалне подеш шÿрым, шудо чайым шолта, йÿдым палаткыште эртара. А спорт туризм дене кылым кучышо еҥ тиде сомыл деч посна эше палыдыме чодыраште кÿлеш верым чын муын мошта, курыкыш талын кÿза, тÿрлӧ заданийым шукта.
Туризм слётыш шочмо кундемым йӧратыше да аклыше-влак погыненыт. Куд кече жапыште нуно чулымлыкыштым, писылыкыштым тÿрлӧ спорт таҥасымаште тергеныт, усталыкышт дене муро да газет савыктыме конкурслаште палдареныт. Мероприятий кышкарыште Йошкар-Олаште эртаралтше патриотизм акцийыш ушненыт. Тудо Российысе да Белоруссийысе калык кокласе кылым пеҥгыдемдымылан, вашумлымашлан пӧлеклалтын.
– 80 ий ончыч коча-кована-влак Кугу Ачамланде сарыште сеҥеныт. Мыланна тыныс илышым, канде кавам пӧлекленыт. Ме нуным тачат шарнен да тауштен илышаш улына, – палемдыш Беларусь делегацийым вуйлатыше Мария Леонидовна Голубьева.
Республикын рÿдолаштыже участник-шамыч Курымашлык тул воктеке пеледышым пыштеныт, экскурсий дене коштыныт. Марий Эл нерген пален налмыштым краеведений диктантым возымаште пеҥгыдемденыт.
Беларусь Республик гыч слётыш шым команде ушнен. Теве Минск ола гыч Илья Буренович шке элыште да Российыште эртаралтше шагал огыл таҥасымаште лийын.
– Ача-авам походыш кошташ йӧратат, мыйымат эре пырля налыт. Нунылан кӧра туризм деке кумылаҥынам. Тÿрлӧ вере кошташ да кумдыкым шымлаш келша. Ты слётыш толмемлан моткоч йывыртенам. Марий кундемыште мемнам пеш шокшын вашлийыныт. Калык муро да куштымаш дене палдареныт, – ойла Илья.
Туризм капкылым шуараш, тÿр лӧ кундем дене палыме лияш, икоян еҥ-влак дене вашкылым ышташ йӧным пуа. Кугу тÿнян моторлыкшым, поянлыкшым ужаш полша. Ӱдыр-рвезе-влак, а те тений походышто лийында?
Оля МАЙКОВА.
Авторын фотожо.
