Ура чонан, чолга, усталык шӱлышан туныктышо-наставник А.А.Сапаевым шарнен, Волжский район Сотнур школышто 15 майыште мероприятий эртаралтын. Ила гын, Анатолий Александровичлан 4 мартыште 70 ий темеш ыле.
А.А.Сапаев ӱмыржӧ мучко йоча-влак коклаште лийын. Волжский районысо тӱрлӧ школышто марий йылме ден литературым, ИКН предметым туныктен, «Сылнымут сескем» юнкор кружокым вӱден. Сотнур школышто вӱдымӧ ты кружокшо 2005 ийыште «Ямде лий» газет редакцийын эртарыме «Рвезе йӱк» конкурсышто В.Исенеков лӱмеш премийым сеҥен налын. Уста туныктышо йоча-влакым почеламутым сылнын лудмо тӱрлӧ конкурсыш ямдылен да шкежак коштыктен. Икшыве-шамыч эре сеҥышыш лектыныт. А.А.Сапаев шкежат тыгай мероприятийлашке ушнен да ятыр гана ойыртемалтын. Чон йӱлен пашам ыштыше наставникын корныжым кызыт ятыр тунемшыже шуя.
Мероприятийышке погынышо туныктышо, тунемше, родо-тукымжо, уна-влак, А.А.Сапаевым шарналтен, ятыр поро мутым ойленыт. Чыланат иктым палемденыт: кӧргӧ виян, пеҥгыде, пашам мучаш марте шуктышо Анатолий Александрович чыла моштымыжым, палымыжым йоча-шамычым туныктымылан, чын илыш корныш шогалтымылан пуэн. Кочаштым шарнен, уныкаже-влак мероприятийышке ушненыт. Рома почеламутым лудын, Даша ден Маша шиялтыш дене шоктеныт.
Туныктышылан пӧлеклалтше почеламутым сылнын лудмо районысо конкурсышто Сотнур, Карай, Кугу Корамас, Памар школла гыч йоча-влак таҥасеныт. 1-4-ше да 5-7-ше класслаште тунемше-шамыч почеламутым рушла да марла лудыныт. Кок тӱрлӧ ийготан-влак коклаште сеҥышыш Памар школышто тунемше-влак Настя Герасимова ден Милена Крылова лектыныт.
Пагалыме туныктышо А.А.Сапаевым калык порын шарна. Ты шарнымаш эре илаш тӱҥалеш.
Л.ГРИГОРЬЕВА.
