Тоштерысе йӱд

Тоштерын тӱнямбал кечынже Россий мучко «Ночь музеев» акций эртаралтын. Тиде кечын меат авам дене ӧрдыжеш кодын огынал. Йошкар-Оласе кок тоштерыш миенна, ончер площадкылаште лийынна, вич мастер-классыш ушненна. Шкаланна шуко ум, оҥайым да ӧрыктарышым почынна. Начарын ужшо-шамычлан келыштарыме «Тактильный выставкыште» лийынна. Ӧрыктарен: тушто сӱрет-шамычым ончаш гына огыл, колышташ да ӱпшынчаш лиеш. Тыгак мо тыгай «ЭБРУ», пален налынна. Пӱртӱс материалым кучылтын, пидаш да тӱрлаш тунемынна, сӱретым ыштенна. А эше Марий кундем нерген книгам модын налынна.

Пидме марий тӱр поснак ӧрыктарен. Чаманен каласыман, авторжым ом пале, но ты паша кугешнаш таратен.

«Ночь музеев» акций тӱвыра деке эшеат лишемден да умбакыжат кылым кучаш кумылаҥден.

Мария НОВОСЁЛОВА.

Медведево посёлко.