Чон шокшышт кажнылан

14 майыште Аван тӱнямбал кечыжым пайремлат, 15 майыште – Ешын тӱнямбал кечыжым. Нине пайрем-влак икте-весышт дене пеҥгыдын кылдалтыныт. Нуным ойырашат ок лий. Ава – илышын негызше, ешын рӱдыжӧ. Тудын нерген ик притчым шарналтышым. Икана икшыве-влак, авашт кӧм эн чот йӧрата манын, икте-весышт коклаште ӱчашеныт, чыным кычалыныт. Тиде йодышым авалан пуэныт. Лишыл еҥышт кидыш сортам налын да ойлаш тӱҥалын: «Мый сорта улам. Тудын тулжо – йӧратымашем». Ава эше ик сортам кучен да кидысе сорта тулжо дене ылыжтен. «Тиде икымше икшывем. Мый тудлан шке шокшемым пуышым. Ончалза, сорта тулем иземе мо? Уке, тугаяк кодо», – умылтарен ава. Вара кажне икшывылан сортам чӱктен. А шке сортаже тугак чолгыжын йӱлен.

Морко посёлко гыч С.В.Юрьева лач тыгак чон шокшыжым вич икшывыжлан пӧлекла. Светлана Владимировна ден Михаил Андреевич Юрьевмыт латкуд ий икте-весым умылен да пагален илат. Икшывышт-влакым ончыкылык илышлан изинек ямдылат.  Вет шкештат йочашт годым уста, чулым кушкыныт. Ача куштылго ат-летикылан шӱман лийын, ече дене писын чымен, футболла модын. Шуко таҥасымаште сеҥышыш лектын. Ава юнкор кружокыш коштын. Почеламутшо, мыскараж ден ойлымашыже-влак «Ямде лий» газетеш савыкталтыныт. Нуным, пӱчкын луктын, посна тетрадьыште кызытат арала. Тыгак Морко тӱвыра полат пеленысе «Рвезылык» ансамбльыште мастарлыкшым вияҥден.

Аван усталык шӱлышыжӧ, ачан чулымлыкшо кугурак ӱдырыштлан кусненыт. Даша  И.С.Палантай лӱмеш тӱвыра да сымыктыш колледжын Национальный сымыктыш гимназийыштыже 9-ше классыште тунемеш. Изинек артист койышан улмыж дене ойыртемалтын. 2-шо номеран Морко школышто шинчымашым погымыж годым икымше класс гычак мураш тунемаш коштын. – Мый Шкетан лӱмеш Марий драме театрыште кажне артистын модмыжым кугешнен ончем. Мыят нунын гай лийнем. Калыклан куаным да сай кумылым пӧлеклынем, – ойла Даша.

Ӱдыр «Авамлан серыш», «Мый да шочмо йылмым туныктышем», «Колумб лудмаш» да республикысе моло конкурслаште ойыртемалтын.

Юрьевмытын кокымшо икшывышт – Анита. Тудо 2-шо номеран Морко школышто визымше классыште тунемеш. «Юный художник» кружокыш кокымшо ий коштеш. Лишыл еҥже-влаклан кажне пайремлан мотор сӱретым пӧлекла. Аважлан шольыж ден шӱжарже-шамычым он-чаш полша. Арина ден Маша йочасадыш коштыт, Матвей шольышт кандаш тылзаш.

М.А.Юрьев Украиныште эртаралтше спецоперацийыш Шочмо элым аралаш шке кумылын каен. Садлан чыла сурт сомыл – аван вачӱмбалныже. Тунам, казам, чывым ашнат. Пакчасаскам шындат, пашашке тӱшкан ушнат.

Шуко шочшан ава лияш куштылго огыл. Кажне икшывын койыш-шоктышыжым эскерен, мастарлыкшым жапыштыже шекланен,  чын корно дене виктарен моштыман. Нуным йӧратыман, умылыман,  чӱчкыдынрак ӧндалман. Йоча-влакым ойыркалыман огыл. Аван тулжо, шокшыжо кажнылан ситышаш, – ойла Светлана Владимировна.