Шочмо йылмым пагалымаш, марий сылнымутым аклымаш, книгам лудаш кумылаҥдымаш да шуко моло лач еш гыч тӱҥалеш. Ача-ава-влак шке икшывыштым кузе туныктат, йоча тудо корно дене вияҥеш, да тидым кӱлешанлан шотла. Теве ака-шӱжар Александра ден Елена Васильевамыт Морко посёлкышто илат, 2-шо номеран школышто тунемыт. Марий йылмым шочмо йылмыштлан шотлат. Школышто келге шинчымашым налме верч тыршат. Ешыште утларакше марла мутланат. Ава-ача Татьяна Эдуардовна ден Сергей Николаевич ӱдыр-влакым изинек тыге туныктат. Татьяна Эдуардовна Александрам почеламутым сылнын лудаш кумылаҥда гын, Елена мураш йӧрата. Районышто эртаралтше Казаков, Чавайн, Колумб лудмашлаште усталыкыштым тергат да сеҥыше-влак радамыш лектыт. Морко район Мызэҥерыште шукерте огыл эртаралтше «Колумб лудмаш» регион-влак кокласе сылнымут да мурсем фестиваль-конкурсышто ака-шӱжар сеҥыше лийыныт.
– Сеҥымашке шумаште аванан надырже моткоч кугу. Тыгак марий йылмым туныктышем Валентина Анатольевна Яковлевалан таум каласем, – ойла Александра. – Тудо полшаш, кӱлешан ой-каҥашым пуаш эре ямде.
Икшывын шӱм-чонеш сылнымут сескемым икана ылыжтен кертат гын, тудо ӱмыр мучко йӱлаш тӱҥалеш: шкем сымыстарен да калыкым куандарен.
Л.ГРИГОРЬЕВА.
Авторын фотожо.
