Кугу пӧрт. Тыште эрже-касше йоча йӱк шокта. Тыште ава ныжыл шомакше дене шымата, ача пеҥгыде лияш туныкта, йоча-влак кумда илыш корнылан ямдылалтыт. Тиде пиалан кугу еш. Тыгай ешым 24 ий ончыч Алексей Петрович ден Валентина Шакеровна чумыреныт. Егошинмыт (снимкыште) У Торъял посёлкышто илат. Куд икшывылан ош тӱням пӧлекленыт.
Мурылан шӱман улыт
Озавате – косметолог, массажист. Чурийым, капкылым моторемда да эмла. Суртоза шке жапыштыже У Торъял районым вуйлатен, инженерлан пашам ыштен, кызыт сулен налме канышыш лекше офицер. Тыгак черкыште пономарьлан шога. Икымше икшывышт Елена Йошкар-Оласе медицине колледжыште тунемеш. Ешан, ӱдыржӧ кушкеш. Валерият ты колледжыште келге шинчымашым налын. Кызыт рӱдоласе перинатал рӱдерыште медшӱжарлан пашам ышта. Тудат ешан. Богдан Ежово селаште верланыше Марий аграрный колледжыште ветеринар лияш ямдылалтеш. Нуно чыланат музыкальный школыш коштыныт, тӱрлӧ семӱзгар дене шоктен моштат.
Изирак кум икшыве – ача-ава пелен. Мария 7-ше классым тунем пытарен. Тудо кушташ кумылан. У Торъял посёлкысо тӱвыра пӧртыштє мастарлыкшым тапта. «Импульс» ансамбльыш коштеш. Ӱдыр тыгак художественный гимнастике дене кылым куча. Сеҥымашыжат уло. Настя шушаш тунемме идалыкыште 6-шо классыш вонча. Тӱвыра полатыш коштеш. Мурашат, кушташат мастар. «Камертон» российысе конкурсышто кокымшо верым сеҥен налын. «Душа России» регион-влак кокласе калык патриот муро фестиваль-конкурсышто кумшо лийын. Эн изи икшыве – Юлия. Кумшо классым тунем пытарен. Тудо музыклан эн чот шӱман. У Торъял посёлкысо Э.Н.Сапаев лӱмеш йоча сымыктыш школышто да Тӱвыра полатыште усталыкшым вияҥда. Тудым Лиана Владимировна Смирнова мураш туныкта. Семым моткоч сайын шижеш. Баян, шиялтыш дене шокта. Грамот ден дипломжым шотлен от пытаре. «Душа России» регион-влак кокласе фестиваль-конкурсышто, «Наследники Победы» районысо патриот муро конкурсышто, «Радуга над Кокшагой» тӱнямбал фестиваль конкурсышто икымше верым сеҥен налын.
– Йоча-влаклан муро дек йӧратымаш мый дечем куснен, очыни. Шке жапыштыже культпросветучилищыш (кызыт И.С.Палантай лӱмеш тӱвыра да сымыктыш колледж) актёр да режиссёр пӧлкаш тунемаш пуренам. Но тӱрлӧ амаллан кӧра тунемын пытарен омыл. Сайын муренам, куштенам, – ойла ава.
Эре пырля
Егошинмыт моло еш семынак пакчасаскам ончен куштат, чывым, бройлер чывигым, комбым ашнат.
– Йоча-влакым пашалан изинек туныктена. Кеҥеж мучко шӱкшудым сомылат, вӱдым шават. Мӧҥгысӧ кайык-шамычым эскерат, пукшат. Ме нунылан шуко пашам ӱшанен кертына, – ойлат ача-ава.
Егошинмыт жапым пырля эртараш йӧратат. Шнуй верлашке коштыт: Татарстан Республикысе Раиф монастырьыш, Угарман кундемысе Дивеево селаш. Ончыкыжым Екатеринбург олаш «Ганина Яма» черке комплексыш миен толаш шонат. Килемар районышто верланыше Молевое ер серыш православий походышкат коштыныт. Теҥызышкат миен толыныт.
– Еш – тиде изи черке, тиде йӧратымаш да ӱшан дене темше вер. Кугу еш – кугу пиал. Тыште икшыве-шамыч шукылан тунемыт, – ойла Валентина Шакеровна.
Ача-ава йочалан сай примерым ончыктышаш улыт. Егошинмыт шочшышт таза капкылан кушкышт манын тургыжланат, садлан спортланат жапым ойырат. Тўшка таҥасымашлашкат еш дене ушнат. Мутлан, фрироуп дене «Мы – туристическая семья» районысо таҥасымаште сеҥышыш лектыныт.
– Тек кажне суртышто йєратымаш, икте-весым умылымаш, куан озаланат. Пелен ончыко вӱдышӧ, тӱрлӧ сай сомыллан кумылаҥдыше лишыл еҥ-влак лийыт. Йоча-шамыч таза да пиалан кушкышт, – ойлат ача-ава.
Христина АЛЕКСАНДРОВА.
Фотом еш архив гыч налме.
